Kauphöll Íslands. Reuters

Einungis tvö félög í Úrvalsvísitölu Kauphallarinnar hækkuðu í verði í ár. Það var gengi Össurar sem hækkaði um 53% og Færeyja banka um 7%. Hlutabréfaverð Icelandair og Atlantic Petroleum lækkaði aftur á móti mest, eða um ríflega 70% fyrir hvort félag. Þetta kemur fram í Hagsjá Landsbankans.

Það var tíðindalítið árið sem nú er að renna sitt skeið á íslenskum hlutabréfamarkaði. Úrvalsvísitalan sem áður stóð saman af 15 félögum hefur nú aðeins 6 félög undir sínum hatti og þar til viðbótar eru 4 félög sem myndar svokallaðan Aðallista. Heildarvísitala Aðallistans lækkaði um nærri 90% á síðasta ári en í ár lækkaði hún um 16%. Fyrri hluti ársins, eða öllu heldur fyrsti ársfjórðungur, var slæmur en á honum lækkaði heildarvísitalan um þriðjung. Staðan batnaði umtalsvert eftir veturinn og hækkaði heildarvísitalan t.a.m. um tæp 18% í maí. Gengi Bakkavarar og Marels lækkaði síðan í líkingu við úrvalsvísitöluna sjálfa eða um fimmtung.

Skuldabréfaveltan um 220 milljarðar króna á mánuði

Velta á hlutabréfamarkaði þetta árið var að meðaltali 2,9 milljarðar króna á mánuði en sú tala er meira í líkingu við dagsveltu á árunum 2006-2008. Hryggjarstykki kauphallarveltunnar í ár var því skuldabréfaveltan, en hún var að meðaltali 220 milljarðar króna á mánuði eða hundraðfalt meiri en hlutabréfaveltan.

Vantar skýrari leikreglur og dómarinn að hafa betri tök á leiknum

„Það verður því seint sagt að hlutabréfamarkaðurinn hafi verið bílstjórasætinu þetta árið og jafnvel orðum aukið að segja að hafi einu sinni verið í aftursætinu, skottið á að öllum líkindum best við.

Traust á hlutabréfamarkaði er ekki mikið um þessar mundir eftir raunir undangenginna ára. Aftur á móti býður slíkur markaður upp á tækifæri þegar aðstæður fyrir fyrirtækjarekstur fara að batna á nýjan leik. Til þess að fjárfestar treysti sér á ný inn á leikvöllinn þurfa leikreglur að vera skýrari og leikmenn að skynja að dómarinn hafi betri tök á leiknum," að því er segir í Hagsjá Landsbankans.