Atvinnulausum fjölgaði um 25,4% á Spáni á síðasta ári en 3.923 þúsund voru skráðir á atvinnuleysiskrá þar um áramót. Alls fjölgaði atvinnulausum um 794.640 á síðasta ári sem er minni aukning heldur en árið 2008 en þá bættist tæplega ein milljón manna við á atvinnuleysisskrá á Spáni.

Tölur um hlutfall atvinnulausra eru einungis birtar ársfjórðungslega á Spáni en samkvæmt tölum frá Eurostat, hagstofu Evrópu í lok október, var atvinnuleysi 19,3% á Spáni. Hvergi annars staðar í ríkjum Evrópusambandsins er atvinnuleysi jafn mikið nema í Lettlandi. Að meðaltali mældist atvinnuleysi 9,8% í evru-ríkjunum í lok október.

Atvinnuleysi mældist 8,2% í Þýskalandi á síðasta ári

Í Þýskalandi mældist atvinnuleysi 8,2% á síðasta ári, samkvæmt nýjum  tölum frá vinnumálastofnun Þýskalands. Atvinnuleysi mældist 7,8% í desember sem er aukning úr 7,6% í nóvember í Þýskalandi.