Greining Íslandsbanka reiknar með að peningastefnunefnd Seðlabankans haldi stýrivöxtum bankans óbreyttum þegar hún kynnir næstu vaxtaákvörðun 27. janúar. 

Nefndin lækkaði síðast vexti bankans í desember og sagði þá í yfirlýsingu að haldist gengi krónunnar stöðugt eða styrkist, og verðbólga hjaðni eins og spáð sé, ættu forsendur fyrir frekari slökun peningalegs aðhalds að vera áfram til staðar. 

Greining Íslandsbanka segir, að frá síðustu vaxtaákvörðun nefndarinnar hafi gengi krónunnar aðeins styrkst og verðbólgan hjaðnað. Hins vegar megi búast við að verðbólgan aukist nokkuð í janúar, aðallega vegna hækkunar á óbeinum sköttum sem peningastefnunefndin muni líta framhjá við ákvörðun sína.

Þá sé vaxandi framleiðsluslaki í innlendum þjóðarbúskap, samdráttur landsframleiðslu umtalsverður og atvinnuleysi að aukast enn. Það virðist því vera að þau tvö skilyrði sem peningastefnunefndin setji fyrir frekari slökun peningalegs aðhalds hafi skapast frá síðustu vaxtaákvörðun nefndarinnar.

„En að fleiru er að hyggja. Sú ákvörðun forseta að vísa Icesave-lögunum í þjóðaratkvæðagreiðslu hefur aukið áhættuálag á íslenskar fjáreignir... Einnig hefur lánshæfiseinkunn íslenska ríkisins verið lækkuð í kjölfar ákvörðunar forsetans. Þá hefur ákvörðunin skapað óvissu um framvindu efnahagsáætlunar Íslenskra stjórnvalda og Alþjóðagjaldeyrissjóðsins og mun væntanlega fresta lánum frá AGS og Norðurlöndunum, en þau voru ætluð til að byggja upp gjaldeyrisforða Seðlabankans," segir Greining Íslandsbanka í Morgunkorni.

Telur bankinn að  óvissan, sem skapast hafi í kjölfar ákvörðunar forseta um að vísa Icesave-lögunum í þjóðaratkvæðagreiðslu, valdi því að peningastefnunefnd bankans ákveði að halda vöxtum bankans óbreyttum nú. Nefndin mun einnig líklega bíða áttekta með frekari vaxtalækkun þar til línur skýrast í því máli. Ákvörðun forseta haldi því óverðtryggðum vöxtum háum lengur í landinu en ella hefði verið. 

„Ef lögin verða samþykkt reiknum við með því að veðlánsvextir bankans til sjö daga verði komnir í 7% í lok árs og innlánsvextir í 6%. Ef sæmileg sátt verður fljótlega komin um nýja samningalotu og meðfylgjandi meðferð Alþingis gæti vaxtalækkunarferlið orðið svipað. Byggjum við spá okkar á að annað hvort verði en í spánni er mikil óvissa. Synjun laganna og sú töf sem af því hlýst á framgangi áætlunar AGS og stjórnvalda, útgreiðslu lána í því sambandi, afléttingu gjaldeyrishafta og innflæði fjármagns vegna stórra fjárfestinga gæti hins vegar leitt til þess að vextir yrðu talsvert hærri í lok árs eða a.m.k. 2 prósentum. Ekki er hægt að útiloka að í slíku ferli myndi peningastefnunefndin ákveða að hækka vexti Seðlabankans," segir Greining Íslandsbanka.