Guðmundur Rúnar Guðmundsson

Um 200 stofnfjáreigendur í Byr-sparisjóði hafa stofnað Samtök stofnfjáreigenda í BYR sparisjóði. Tilgangur grasrótarsamtakanna er að vinna að helstu hagsmunamálum stofnfjáreigenda Byrs og að viðgangi og vexti stærsta sparisjóðs landsins, að því er segir í tilkynningu frá samtökunum.

Tilkynning samtakanna:

„Eitt af helstu viðfangsefnum félagsins um þessar mundir er að gæta hagsmuna stofnfjáreigenda Byrs í tengslum við þá víðtæku endurskipulagningu sem á sér stað innan sparisjóðakerfisins. Aðkoma ríkissjóðs að sparisjóðnum hefur í för með sér að ríkið eignast ráðandi meirihluta í sparisjóðnum á sama tíma og eignarhlutur hinna 1.500 stofnfjáreigenda í sjóðnum þynnist verulega út.

Mikilvægt er að ríkið sýni sanngirni í þeirri vinnu sem brátt fer að ljúka en vert er að benda á að stofnfjáreigendur lögðu sparisjóðnum til 30 milljarða króna á árunum 2007 og 2008 í tengslum við samruna Byrs og Sparisjóð Norðlendinga. Flestir stofnfjáreigendur í Byr hafa verið dyggir viðskiptavinir og starfsmenn sparisjóðsins um árabil og bera sterkar tilfinningar til hans.

Annað mikilvægt málefni, sem félagið lætur sig varða, snýr að skuldastöðu margra stofnfjáreigenda gagnvart fjármálafyrirtækjum vegna stofnfjárkaupa. Þegar stofnfé var aukið verulega í árslok 2007 voru hundruð einstaklinga nauðbeygðir til að skuldsetja sig fyrir kaupunum, ellegar að horfa fram á 87% þynningu eignarhlutar síns.

Á stofnfundi félagsins, sem haldinn var þann 15. janúar, var stjórn þess kjörin. Hana skipa Birna Eggertsdóttir, Eggert Þór Aðalsteinsson (formaður), Gísli Jafetsson, Guðmundur Ingi Jónsson, Sveinbjörn Snorri Grétarsson og Willum Þór Þórsson.“