Sneri á keppinautinn
Starsfmenn Cimber Sterling beittu óvenjulegum aðferðum í samkeppni við norskt flugfélag..
Norska flugfélagið Norwegian er ekki ánægt með danska keppinautinn Cimber Sterling en bæði flugfélögin eru á svonefndum lággjaldamarkaði. Norwegian bauð nýlega 3000 flugmiða frá Kaupmannahöfn til Karup á Jótlandi fyrir 1 norska krónu og þeir seldust upp á skammri stundu. En þegar fyrsta flugið átti að fara mættu engir farþegar.
„Það vantaði 118 farþega í fyrsta flugið. Allir þessir miðar höfðu selst og okkur fór strax að gruna að það væri maðkur í mysunni," hefur Finansavisen eftir Anne-Sissel Skånvik, upplýsingafulltrúa Norwegian.
Við nánari skoðun kom í ljós, að margir þeirra, sem keyptu flugmiðana, starfa hjá danska félaginu Cimber Sterling, sem m.a. keypti hluta af þrotabúi flugfélagsins Sterling sem var í íslenskri eigu.
Þá voru einnig margir miðanna keyptir undir dulnefnum. Meðal annars keypti Andrés önd sér flugferð.
Jakob Krogsgaard, framkvæmdastjóri Cimber Sterling, segir að þetta hafi ekki verið runnið undan rifjum fyrirtækisins. Hafi starfsmenn félagsins keypt flugmiða af Norwegian þá hafi þeir gert það af eigin hvötum.
„Ég hefði sjálfur ekki gert þetta. En ég hefði heldur ekki selt flugmiða á 1 krónu þar sem skattar eru innifaldir því það er langt undir kostnaðarverði," segir Krogsgaard.
Alex Dyrgaard, sem stýrir lögfræðideild Cimber Sterling, segist sjálfur hafa keypt nokkra miða. „Ég staðfesti að ég hef keypt miða en ég vil ekki upplýsa hve marga enda er það mitt einkamál," segir hann við danska blaðið Børsen. Blaðið segir að Norwegian hafi upplýsingar um að Dyrgaard hafi keypt 54 miða.
