Hluthafafundur Geysis Green Energy fer fram næstkomandi þriðjudag. Samkvæmt heimildum Morgunblaðsins er það Íslandsbanki, stærsti lánardrottinn félagsins, sem krafðist fundarins en á honum munu tveir fulltrúar bankans taka sæti stjórn í GGE. Þar með mun Íslandsbanki ná undirtökum í félaginu en auk þess að vera helsti lánardrottinn þess þá á bankinn aðkomu gegnum sjóðinn Glacier Renewable Energy Fund. GRE á 40% í GGE og er sjóðnum stýrt af Íslandsbanka.

Eins og fram hefur komið í blaðinu er staða GGE afar erfið og stjórn félagsins hefur lýst yfir að eignir félagsins verði seldar. Þær eru helstar um 55% hlutur í HS Orku, Jarðboranir auk ýmissa jarðhitaverkefna erlendis. Heimildir blaðsins segja að fulltrúar Íslandsbanka vilji ganga hratt til verks í þessum efnum en GGE skuldar bankanum um 25 milljarða. Frekar er rætt um mánuði en ár í þessum efnum samkvæmt heimildum blaðsins.

Breyting á afstöðu Atorku

Núverandi stjórn Atorku, sem á 41%, í GGE hefur verið andsnúin þessum áformum en kröfuhafar hafa hinsvegar tekið yfir félagið. Stærstu kröfuhafar Atorku eru Landsbankinn og Íslandsbanki. Heimildarmenn blaðsins segja að Landsbankinn sé í megindráttum sammála þeirri stefnu sem hefur verið mótuð í Íslandsbanka varðandi framtíð GGE.

Afstaða kröfuhafa Atorku ætti að meðal annars að stýrast af því að í greinargerð sem var lögð fram með nauðasamningafrumvarpi Atorku á dögunum er eignarhluturinn í GGE sagður vera að öllum líkindum lítils virði. Ástæðan fyrir því er að undirliggjandi verðmæti eigna GGE duga að öllu óbreyttu varla til þess að standa undir skuld félagsins við Íslandsbanka. Hagsmunir kröfuhafa Atorku felast því væntanlega í að eignasala dugi til þess að greiða kröfur Íslandsbanka og að eitthvað verði svo til skiptanna að því loknu.

Ekki verður sagt að kjöraðstæður séu til eignasölu um þessar mundir og það mun væntanlega ráða mestu um hversu hratt verður gengið til verks við sölu eigna um þessar mundir. Auk þess kunna forkaupsréttarákvæði í samþykktum HS Orku að flækja sölu á eignarhlut GGE í félaginu. Annar stærsti hluthafi HS Orku er kanadíska jarðvarmafyrirtækið Magma Energy en það ræður yfir um 40% hlut. Kjölfesta Magma í HS Orku kann ennfremur að hafa áhrif á hvaða fjárfestar séu reiðubúnir að koma inn í félagið.

Einnig má leiða líkum að því að möguleikarnir til sölu á Jarðborunum kunni að vera takmarkaðir um þessar mundir. Annað er upp á teningnum þegar kemur að erlendum jarðvarmaverkefnum en eins og sagt var frá í Morgunblaðinu í desember hafa erlendir fjárfestar sýnt þeim áhuga.