Sportbíll frá Spyker. Reuters

Hollenski sportbílaframleiðandinn Spyker Cars, sem í dag gerði bindandi samkomulag við General Motors um að kaupa sænska bílaframleiðandann Saab, er smáfyrirtæki í bílaiðnaði.

Spyker framleiddi 21 bíl á fyrsta fjórðungi ársins 2009 og seldi 23. Bílarnir eru hins vegar dýrir og kosta frá 199.990 evrum, jafnvirði 36 milljóna króna. Til samanburðar seldi Saab nærri 100 þúsund bíla á árinu 2008.

Victor Muller, forstjóri og annar stofnandi Spyker, hefur sjálfur lýst fyrirtækinu þannig, að það sé eins og moskítófluga í samanburði við fílinn Saab. 99 manns starfa við að setja saman Spyker-bíla en 3400 starfsmenn vinna hjá Saab í Svíþjóð.  

Höfuðstöðvar Spyker eru í Zeewolde í miðju Hollandi. Rússneska fjármálafélagið Convers, sem er að stærstum hluta í eigu rússneska milljarðamæringsins Vladímírs Antonovs, á 30% í Spyker og  Mubadala Development Company, sem er í eigu stjórnvalda í Abu Dhabi, á 25%. 

Spyker var fyrst stofnað árið 1898 af bræðrunum Jacobus og Hendrik-Jan Spijker. Það framleiddi lúxusbíla og flugvélar en hætti síðan starfsemi árið 1925. Það var endurvakið árið 2000.

Blaðamaðurinn Andre Hoogeboom, sem hefur skrifað bók um fyrirtækið, segir að Spyker bílar séu handsmíðaðir eftir óskum kaupendanna. Fyrirtækið hefur aldrei skilað hagnaði. Það smíðaði 43 bíla árið 2008 og seldi 37 og veltan nam 7,85 milljónum evra,  rúmlega 1,4 milljarði króna. Það var 53% aukning frá árinu áður en samt var nærri 25 milljóna evra tap á rekstrinum. 

Í nóvember í fyrra tilkynnti Spyker, að verksmiðjur fyrirtækisins yrðu fluttar frá Zeewolde til Coventry á Englandi til að draga úr kostnaði. Jafnframt voru 45 störf af 135 lögð niður. 

Hoogeboom segir, að erfiður rekstur stafi af dýrri framleiðslu en einnig því, að Spyker tók þátt í Formúlu 1 kappakstrinum árið 2006, sem kostaði fyrirtækið tugi milljóna evra.