Nýherji tapaði 686 milljónum króna á síðasta ári en árið á undan nam tap félagsins 771 milljón króna. Þórður Sverrisson, forstjóri Nýherja segir að reksturinn hafi verið afar erfiður á síðasta ári.

„Rekstur Nýherja hf. var afar erfiður á árinu 2009 og tap á rekstri. Aðstæður á íslenskum markaði einkenndust af miklum samdrætti í eftirspurn vegna minni fjárfestinga fyrirtækja í tæknibúnaði og uppsetningu hugbúnaðarkerfa. Á upplýsingatæknimarkaði hafa þessar aðstæður leitt til þrenginga en tugir milljarða króna hafa verið afskrifaðir af skuldum helstu keppinauta félagsins og fyrirtækin endurreist í eigu ríkisbanka. Þessar aðgerðir raska samkeppnisaðstæðum og afkomu annarra fyrirtækja á upplýsingatæknimarkaði. Nýherji hefur mætt þessum efnahagserfiðleikunum með því að sjá á eftir á annað hundrað starfsmanna sinna frá hruni bankanna. Í janúar á þessu ári hefur reynst nauðsynlegt að grípa til frekari hagræðingaraðgerða til að mæta þeim óeðlilegu aðstæðum sem eru á innlendum markaði.

Þó að óvissa sé mikil í efnahagslífinu eru jákvæð teikn um viðunandi rekstur á árinu 2010 þar sem horfur eru á að samningar náist um ýmis stærri verkefni hjá fyrirtækjum samstæðunnar hérlendis og erlendis. Til þess að tryggja fjárhagsstöðu félagsins er nú unnið með viðskiptabönkum að því að ljúka fjárhagslegri endurskipulagningu og samningum um langtíma fjármögnun í samræmi við þær aðgerðaáætlanir sem bankarnir hafa boðað gagnvart fyrirtækjum, ásamt aukningu á hlutafé Nýherja. Gert er ráð fyrir að því ferli verði lokið í öðrum ársfjórðungi," segir Þórður í fréttatilkynningu.

Hér er hægt að lesa nánar um uppgjör Nýherja