Actavis bauð í Ratiopharm
Lyf frá Ratiopharm.
Reutersfréttastofan hefur eftir heimildarmönnum, sem þekkja til söluferlis þýska lyfjafyrirtækisins Ratiopharm, að íslenska lyfjafyrirtækið Actavis í samvinnu við sænska fjárfestingarfélagið EQT, og ísraelska lyfjafyrirtækið Teva hafi á föstudag lagt fram tilboð í Ratiopharm.
Einnig er búist við að bandaríska lyfjafyrirtækið Pfizer leggi fram tilboð síðar í þessum mánuði.
Heimildarmenn Reuters segja hugsanlegt, að Ratiopharm muni ræða áfram við öll fyrirtækin en reiknað var með því að tilboðin væru í námunda við 3 milljarða evra, jafnvirði 530 milljarða króna. Yrði það stærsta yfirtaka á lyfjafyrirtæki frá því Teva keypti bandaríska fyrirtækið Barr árið 2008 fyrir 7,5 milljarða dala, jafnvirði 968 milljarða króna.
Reuters segir, að Actavis hafi leitað eftir stuðningi frá EQT við yfirtökunnar. Blaðið Wall Street Journal sagði raunar í síðustu viku, að fyrirtækin myndu skila inn aðskildum tilboðum í Ratiopharm þar sem ekki lægi fyrir samkomulag um samstarfið.
Ludwig Merckle er að selja Ratiopharm í samræmi við samkomulag sem faðir hans, Adolf Merckle, gerði við lánardrottna árið 2008. Adolf framdi sjálfsmorð í janúar 2009.
Reutersfréttastofan hefur eftir sérfræðingum, að Teva, sem er stærsti samheitalyfjaframleiðandi heims, sé með dýpri vasa og samlegðaráhrif samruna við Ratiopharm verði mikil.
Hins vegar hafi Actavis styrkt stöðu sína með því að lofa, að viðhalda störfum í þýskalandi ef félagið kaupi Ratiopharm. Actavis og EQT eru sögð hafa ráðið Claudio Albrecht, fyrrum forstjóra Ratiopharm, sem ráðgjafa við kaupin.
„Fjárhagsstaða Teva virðist vera betri... En Actavis kann að höfða meira til fjölskyldunnar, sem er að selja," hefur Reuters eftir sérfræðingi hjá Jefferies.
