Stjórnendur Honda hafa tilkynnt að þeir þurfi að innkalla fleiri bíla vegna galla í líknarbelgjum. Tilkynningin nær til 437.700 bíla, aðallega í N-Ameríku.

Honda tilkynnti í lok árs 2008 að gera þyrfti lagfæringar um innan við 4.000 bílum af gerðinni Accord og Civic sedan. Um mitt síðasta ári tilkynnti fyrirtækið að lagfæringar þyrfti að gera á rúmlega 500.000 bílum vegna galla í loftpúðunum. Nú er ljóst að fyrirtækið þarf að gera endurbætur á enn fleiri bílum.

Þessi tilkynning kemur í kjölfarið á innköllun á bílum frá Toyota sem vakið hefur gríðarlega athygli, en fyrirtækið þarf að gera lagfæringar á yfir milljón bílum.

Honda er annar stærsti bílaframleiðandi í Japan. Í tilkynningu frá fyrirtækinu segir að loftpúðarnir geti sprungið út og með þeim fylgt málmhlutir sem geti skapað hættu fyrir ökumann. Fram kemur í tilkynningunni að þessi galli hafi valdið 11 meiðslum og einu dauðaslysi.

Verð hlutabréfa í Honda féllu strax eftir að yfirlýsingin var birt.