Stofna sameiginlegan sjóð innistæðutryggjenda

Framkvæmdastjórn ESB stefnir að því að leggja fram tillögu næsta sumar um breytingar á reglum um innistæðutryggingar. Gert er ráð fyrir að komið verði á fót sameiginlegum sjóði. Verði tillagan samþykkt er komið í veg fyrir að deilur eins og Icesave-deilan geti komið upp.

Haft er eftir Michel Barnier, sem fer með málefni innri markaðar innan framkvæmdastjórnarinnar á vefnum Europolitics, að tillagan feli í sér að stofnaður verði sameiginlegur innistæðutryggingasjóður fyrir alla banka í Evrópu. Samkvæmt núverandi kerfi er hvert land skuldbundið til að koma á fót tryggingasjóði. Barnier segir að sameiginlegur innistæðutryggingasjóður myndi koma í veg fyrir lagalegan ágreining eins og hafi orðið í kjölfar fjármálakreppunnar.

Barnier vildi ekki staðfesta frétt í Financial Times Deutschland að bönkunum verði gert, þegar fram í sækir, að greiða 2% af innlánum í sjóðinn. Það myndi hafa veruleg áhrif á framtíðarhagnað bankanna.

Í mars á síðasta ári var reglum breytt á þann veg að evrópskum bönkum var gert að greiða meira í tryggingasjóðina. Nú undirbýr framkvæmdastjórn ESB hins vegar tillögur sem gerbreyta kerfinu.

• 4 blogg um fréttina

Bloggað um fréttina

• Ómar Geirsson: Sameiginlegur tryggingasjóður er rökrétt afleiðing af einum innri markaði.
• Þorsteinn H. Gunnarsson: Nýtt byggðasamlag
• Guðmundur Ásgeirsson: Hvað sagði ég?
• Hallgrímur Guðmundsson: ESB viðurkennir meingallað regluverk.