Hertz kaupir 365 bifreiðar
Hendrik Berndsen, stjórnarformaður Hertz, Sigurður Berndsen, fjármálastjóri Hertz, Sigfús B. Sigfússon, framkvæmdastjóri Hertz, og Haraldur Þ. Stefánsson, framkvæmdastjóri Toyota í Kópavogi. Standandi eru Úlfar Steindórsson, forstjóri Toyota á Íslandi og Sigfús R. Sigfússon stjórnarmaður hjá Hertz.
„Samstarf Toyota á Íslandi og Hertz hefur verið mjög náið um langt árabil og er það von stjórnenda beggja fyrirtækja að svo muni verða áfram um ókomin ár," segir í fréttatilkynningu frá Toyota á Íslandi.
Allt hlutafé Bílaleigu Flugleiða ehf., Hertz á Íslandi, var selt til félags í jafnri eigu Sigfúsar R. Sigfússonar, Sigfúsar B. Sigfússonar, Hendriks Berndsen og Sigurðar Berndsen í síðustu viku. Fyrirtækjaráðgjöf Landsbankans annaðist söluna.Þrír síðasttöldu kaupendanna áttu og ráku ALP bílaleigu á árunum 2000-2004. Sigfús R. Sigfússon var um árabil eigandi og forstjóri bifreiðaumboðsins Heklu hf.
Hertz á Íslandi var áður en Landsbankinn tók félagið yfir, í eigu Bergeyjar eignarhaldsfélags ehf., sem aftur var í eigu Smáeyjar ehf., en það félag er í eigu Magnúsar Kristinssonar, athafnamanns frá Vestmannaeyjum, og Lóu Skarphéðinsdóttur, eiginkonu hans.
Samkvæmt frétt Morgunblaðsins frá því nóvember í fyrra er Toyota á Íslandi komið í söluferli. Er það samkvæmt samkomulagi á milli skilanefndar Landsbankans og Magnúsar Kristinssonar, eiganda Toyota. Selja á öll hlutabréf í félaginu og mun fyrirtækjaráðgjöf Nýja Landsbankans sjá um það.
