Actavis gerir dómssátt í Bandaríkjunum
Actavis
Actavis í Bandaríkjunum hefur gert dómssátt um að greiða 3,6 milljónir dala, 462 milljónir króna, við héraðsdóm í Boston. Var framleiðsla Actavis í New Jersey, Actavis Elizabeth, ásökuð um að hækka verð á samheitalyfjum til þess að fá meira greitt út úr tryggingastofnun (Medicaid).
Verður féð endurgreitt til Medicaid í Massachusetts ríki en Medicaid greiðir hluta af lyfjakostnaði þeirra fátækustu.
Actavis er eitt þrettán samheitalyfjafyrirtækja sem ríkissaksóknari í Massachusetts höfðaði mál gegn árið 2003 fyrir ólöglegar verðhækkanir.
Athugasemd frá Actavis sett inn klukkan 14:19
Actavis vill taka fram að málið sem um ræðir snýr að fyrirtækinu Purepac Pharmaceutical Co., á árunum 1997-2003. Lyfjafyrirtækið Alpharma keypti Purepac árið 2001 og Actavis keypti samheitalyfjasvið Alpharma árið 2005. Málssóknin hófst áður en Actavis keypti Alpharma.
Í dómssátt sem gerð var kemur fram að Actavis heldur því fram að verðmyndun hafi verið í samræmi við lög.
