Mexíkóski kaupsýslumaðurinn Carlos Slim Helú er ríkasti maður heims um þessar mundir að mati bandaríska viðskiptatímaritsins Forbes. Litlu munar þó á honum og Bill Gates, stofnandi Microsoft, er í 2. sæti; eignir Helú og fjölskyldu hans eru metnar á 53,5 milljarða dala, jafnvirði tæplega 7400 miljarða króna, eignir Gates eru metnar á 53 milljarða dala.

Björgólfur Thor Björgólfsson hefur undanfarin ár verið á þessum lista og var á síðasta ári  í 701.-793. sæti en eignir hans voru þá metnar á 1 milljarð dala. Hann er ekki lengur á listanum.

Greinilegt er að efnahagsástandið í heiminum er heldur að batna því eignir 10 ríkustu manna heims eru nú metrar á samtals 342 milljarða dala en voru taldar 254 milljarðar dala á síðasta ári.  

„Heimsbúskapurinn er að ná sér á strik. Fjármálamarkaðirnir eru á leið upp, einkum í nýmarkaðsríkjum," sagði Steve Forbes, aðalritstjóri tímaritsins.

Alls eru nú 1011 milljarðamæringar í dölum í 55 ríkjum að mati Forbes en þeir voru í fyrra 793. Metið var hins vegar sett árið 2008, 1125 milljarðamæringar. 

Slim, sem er sjötugur að aldri, er í 1. sæti á listanum í fyrsta skipti. Slim var í þriðja sæti í fyrra en rekstur farsímafyrirtækisins America Movil sem hann á, stærsta farsímafélag Latnesku Ameríku, gekk vel á síðasta ári og það reið baggamuninn.

Flestir milljarðamæringarnir eru þó áfram í Bandaríkjunum, 403 talsins. 97 eru nýir á listanum og búa 62 þeirra í Asíu þar sem mikill hagvöxtur hefur verið víða þrátt fyrir fjármálakreppuna.  Næstflestir milljarðamæringar eru nú í Kína, 64 og 62 í Rússlandi.

248 milljarðamæringar búa í Evrópu og er ríkasti maður álfunnar Frakkinn Bernard Arnault, en hann á fyrirtækið LVMH sem selur Louis Vuitton töskur,  Moet & Chandon kampavín og aðrar lúxusvörur. Eignir hans eru metnar á 27,5 milljarða dala. Spánverjinn Amancio Ortega, sem á verslunarkeðjuna Zöru, er næstríkastur ern hann er talinn eiga  25 milljarða dala.

Svíinn Ingvar Kamprad, stofnandi Ikea, er 11. ríkasti maður heims en eignir hans eru metnar á 23 milljarða dala. Stefan Persson, landi hans,sem auðgaðist á verslunarkeðjunni Hennes & Mauritz, er í 13. sæti en hann er talinn eiga 22,4 milljarða.

Listinn yfir ríkasta fólk heims:

1. Carlos Slim Helú, Mexíkó, fjarskipti, 53,5 milljarðar dala
   
2. Bill Gates, Bandaríkin, Microsoft. 53  milljarðar dala
3. Warren Buffett, Bandaríkin, Berkshire Hathaway. 47 milljarðar dala
4. Mukesh Ambani, Indland, olía, gas. 29 milljarðar dala
5. Lakshmi Mittal, Indland, stál. 28,7  milljarðar dala
6. Lawrence Ellison, Bandaríkin, Oracle. 28  milljarðar dala
7. Bernard Arnault, Frakkland LVMH lúxusvörur. 27.5 milljarðar dala
8. Eike Batista, Brasilía, námugröftur, olía. 27  milljarðar dala
9. Amancio Ortega, Spáni, Zara. 25  milljarðar dala
10. Karl Albrecht, Þýskalandi, stórverslanir. 23,5  milljarðar dala
11. Ingvar Kamprad og fjölskylda, Svíþjóð, Ikea. 23 milljarðar dala
12. Christy Walton og fjölskylda, Bandaríkin, Walmart. 22,5  milljarðar dala
13. Stefan Persson, Svíþjóð Hennes & Mauritz. 22,4  milljarðar dala
14. Li Ka-shing, Hong Kong, ýmsar fjárfestingar. 21  milljarður dala
15. Jim Walton. Bandaríkjunum, Walmart. 20,7 milljarðar dala
16. Alice Walton, Walmart. 20,6 milljarðar dala
17. Liliane Bettencourt, Frakkland,  L'Oreal. 20  milljarðar dala
18. S. Robson Walton, Walmar. 19,8  milljarðar dala
19. Alwaleed Bin Talal Alsaud, Sádi Arabía, fjárfestingar. 19,4  milljarðar dala
20. David Thomson og fjölskylda, Kanada, erfðir. 19  milljarðar dala.

Umfjöllun Forbes