Hollenska fjármálaeftirlitið hefur sektað tryggingafélagið Fortis Holding um 576 þúsund evrur, rúmar 100 milljónir króna, fyrir markaðsmisnotkun og að hafa ekki opinberað upplýsingar sem gætu haft áhrif á verð hlutabréfa félagsins.

Segir í tilkynningu frá fjármálaeftirlitinu að Fortis hafi verið gert að greiða fjórar sektir í síðasta mánuði, hver þeirra er upp á 144 þúsund evrur. Tengist þetta aðgerðum félagsins í tengslum við yfirtöku Fortis á hollenska bankanum ABN Amro árið 2007.

Í október 2008 var banka- og tryggingasamstæðunni Fortis skipt upp. Var bankastarfsemin í Hollandi, þar á meðal ABN Amro, þjóðnýtt af hollenska ríkinu.

Í Belgíu tók franski bankinn BNP yfir bankastarfsemi Fortis. Fortis Holding er enn með tryggingastarfsemi í Belgíu.