Fréttamaður RÚV stendur við frétt sína
mbl.is/Guðmundur Rúnar Guðmundsson
Ægir Þór Eysteinsson, fréttamaður hjá RÚV, segist standa við fréttaflutning sinn um Jón Þorstein Jónsson, fyrrverandi stjórnarformann Byrs. Þetta kemur fram í yfirlýsingu sem Ægir Þór hefur sent fjölmiðlum. Tilefni hennar er yfirlýsing sem Jón Þorsteinn sendi fjölmiðlum í dag.
„Jón Þorsteinn lét almannatengil sinn, Andrés Jónsson, hringja í fréttamann daginn eftir að umrædd frétt birtist í sjónvarpsfréttum RÚV. Andrés ítrekaði að upplýsingar er vörðuðu vinnuveitanda hans væru rangar. Ég tjáði honum þá að ég stæði við fréttina.
Í fréttinni kom fram að þrjú félög tengd Jóni Þorsteini hafi skuldað Byr sparisjóði um þrjá milljarða króna, og áætlanir sparisjóðsins geri ráð fyrir að afskrifa þurfi um helming þeirrar upphæðar. Jón Þorsteinn fullyrðir að þetta sé ekki rétt og dregur heilindi mín og Fréttastofu RÚV í efa. Skoðum málið nánar.
Félag í eigu Jóns Þorsteins, Saxhóll ehf., skuldaði Byr tæpan milljarð króna, en lánið er að fullu greitt. Saxbygg ehf., félag í eigu Jóns Þorsteins og Byggingafélags Gunnars og Gylfa (BYGG) sem nú er í skiptameðferð, skuldar um 418 milljónir króna, en áætlanir sparisjóðsins gera ráð fyrir að afskrifa þurfi um 250 milljónir af þeirri upphæð. Þá gerir sparisjóðurinn ráð fyrir að afskrifa þurfi ríflega milljarðs króna lán til félagsins BYGG Invest, sem er í eigu viðskiptafélaga Jóns Þorsteins. Sparisjóðurinn reiknar því með að tapa háum fjárhæðum á lánum til félaga tengdum stjórnarformanninum fyrrverandi.
Jón Þorsteinn sver af sér öll tengsl við BYGG Invest og heldur því fram að tap félagsins sé sér með öllu óviðkomandi. Í lánabók Byrs, sem fréttastofa RÚV hefur undir höndum, er Jón Þorsteinn hins vegar tengdur við umrædd félög. Fréttaflutningur RÚV tók mið af framsetningu í lánabókinni.
Jón Þorsteinn sendi fréttamanni tölvupóst og bað um leiðréttingu á fréttinni. Ég taldi enga ástæðu til þess með vísan í ofangreint. Ég skoraði hins vegar á Jón Þorstein að veita mér viðtal og svara þeirri gagnrýni, sem birst hefur í fjölmiðlum undanfarið, um lánveitingar til stærstu eigenda bankans í stjórnartíð hans. Mér hefur ekki enn borist svar.
Jón Þorsteinn kaus þess í stað að senda yfirlýsingu frá sér í dag þar sem hann ber af sér sakir. Af þessu tilefni vil ég koma því á framfæri að ég stend fyllilega við fréttaflutning minn af málefnum tengdum Byr sparisjóði og helstu eigendum hans,“ segir í yfirlýsingu Ægis Þórs.
