Gaumur ehf., fjárfestingafélag Jóns Ásgeirs Jóhannessonar, skuldaði 16 milljarða króna samkvæmt ársreikningi fyrir árið 2007. Þar af eru tíu milljarðar króna vegna skuldabréfaláns, en ekki hefur tekist að afla upplýsinga um hver keypti skuldabréfin á Gaum.

Ársreikningi fyrir árið 2008 hefur ekki verið skilað til ársreikningaskrár og því er óljóst hver nákvæm skuldastaða félagsins er í dag. Gaumur er þó í ábyrgð fyrir stærstum hluta láns sem 1998 ehf. fékk til að kaupa Haga út úr Baugi á árinu 2008. Hlutfallsleg ábyrgð Gaums á láni 1998 er ríflega 80%, og nemur því tæplega 40 milljörðum króna.

Samkvæmt ársreikningi 2007 eru um 10 milljarðar króna skulda Gaums á gjalddaga á yfirstandandi ári, en óljóst er hvort skuldirnar voru endurfjármagnaðar fyrir hrun íslenska bankakerfisins.

Gaumur, ISP Eignarhaldsfélag og 101 Capital hafa enn ekki verið tekin til gjaldþrotaskipta, þó nánast öruggt sé að eignir félaganna séu afar langt frá því að ná upp í skuldir, sé vægt til orða tekið. Ef ekki hefur tekist að endurfjármagna félögin á árinu 2008, hafa skuldirnar því safnað vöxtum síðan þá, en eignir horfið.

Sjá nánari umfjöllun um þetta mál í viðskiptablaði Morgunblaðsins í dag.