Segja frásögn um bilaðan Prius ekki standast
Japanski bílaframleiðandinn Toyota Motor segir, að frásögn bandarísks eiganda Toyota Prius, sem sagði að bensíngjöf bílsins hefði fests í botni, standist ekki og rannsóknir á bílnum hafi leitt í ljós að bensínfetillinn og öryggiskerfi bílsins virki eins og til sé ætlast.
Toyota sagði ekki berum orðum, að James Sikes hefði sviðsett atvikið en sagði að rannsóknir á bílnum staðfestu ekki frásögn hans. En Mike Michel, talsmaður Toyota, sagði á blaðamannafundi að rannsóknirnar sýndu, að Sikes hefði þrýst á bensínfetilinn og bremsurnar til skiptis yfir 250 sinnum. Engar skýringar hefðu fengist á þessu.
James Sikes sagðist hafa verið að aka Priusnum sínum, árgerð 2008, á hraðbraut utan við San Diego á mánudag þegar hann tók eftir því að bíllinn fór að auka hraðann af sjálfu sér.
Sikes sagði við sjónvarpsstöðina CNN, að hann hefði
verið á
hraðbrautinni og verið að auka hraðann lítillega til að fara framúr
öðrum bíl sem ekið var inn á hraðbrautina. Hann hafi þá fundið, að
bensínfetillinn hagaði sér einkennilega og haldið áfram í botn.
Umferðarlögregla Kalíforníu sagði að Sikes hafi hringt í neyðarlínu og lýst því skelfingu lostinn þegar hann reyndi að halda stjórn á bílnum sem æddi áfram á yfir 140 kílómetra hraða.
Lögreglu tókst loks að aðstoða Sikes við að stöðva bílinn og leiðbeindi honum gegnum hátalara um hvernig hann gæti notað handbremsuna og síðan drepið á vélinni.
Rannsóknarnefnd
bandarískra umferðarslysa og Toyota sendu sérfræðinga til San Diego til að skoða bílinn. Málið vakti mikla athygli en Toyota hefur átt undir högg að sækja vegna galla í bílum og hafa yfir 8 milljónir bíla verið innkallaðar að undanförnu vegna þess að bensíngjöf bílanna getur fests.
Toyota segist hafa rannsakað bíl Sikes í tvo daga. Bremsurnar að framan voru mjög illa farnar vegna ofhitnunar en bremsurnar að aftan voru í ágætu lagi. Ekkert annað fannst að bílnum.
Í yfirlýsingu frá lögmanni Sikes segir, að hann ætli ekki að tjá sig frekar um málið fyrr en rannsókn bandarískra stjórnvalda á málinu er lokið.
AP fréttastofan hefur eftir tveimur óháðum sérfræðingum, að rannsaka verði einnig hvort truflanir hafi orðið í rafkerfi bílsins.
