Már Guðmundsson, seðlabankastjóri á fundinum í morgun. mbl.is/Ómar

Már Guðmundsson, seðlabankastjóri, segir að meðan enn ríki óvissa þá sé ekki hægt að stíga stærri skref en gert var í dag er stýrivextir Seðlabanka Íslands lækkuðu um 0,5 prósentur. Hann segir að óvissunni geti létt með tvennum hætti, annars vegar að  Icesave deilan leysist og lán verði greidd frá Alþjóðagjaldeyrissjóðnum og hinum Norðurlöndunum. Hins vegar að það ljóst fyrir að að þessi mál taki lengri tíma en áætlað var og ekki sé von á þessum lánum á næstunni. Þá komi til greina að móta nýja efnahagsáætlun.

Að sögn Más telur bankinn ekki ráðlegt að lækka vexti í stærri skrefum eða afnema höftin í stærri skrefum á meðan óvissa ríkir. Ef óvissu léttir þá þurfi hins vegar að meta hvort gjaldeyrishöftin eru afnumin hratt eða stigin stór skref varðandi lækkun vaxta. 

Már segir það persónulega skoðun sína að það ætti að skoða það gaumgæfilega að taka myndarleg skref varðandi afnám gjaldeyrishafta frekar en stærri skref varðandi lækkun vaxta. 

Hann segir að ekki sé  hægt að gefa nákvæmara svar á þessu stigi. „Meðan óvissan er þá getum við ekki gert betur en þetta," sagði Már á fundi með fréttamönnum.

Í greinargerð með lækkun vaxta í dag kemur fram að tafir á lausn deilunnar um bætur vegna innstæðna í erlendum útibúum Landsbankans leiddu til lækkunar lánshæfismats eins hinna alþjóðlegu lánshæfisfyrirtækja og tefja enn aðra endurskoðun efnahagsáætlunar stjórnvalda og Alþjóðagjaldeyrissjóðsins og fjármögnun tengda henni.

Að því gefnu að gjaldeyrishöftin haldi mun töfin ekki hafa umtalsverð skammtímaáhrif á gengi krónunnar.

Hins vegar væri áhættusamt að afnema gjaldeyrishöftin eða lækka vexti í stórum skrefum á meðan lán frá Alþjóðagjaldeyrissjóðnum og Norðurlöndum fást ekki, eða aðgangur að alþjóðlegum fjármálamörkuðum á viðunandi kjörum er ekki greiður.

Haldist gengi krónunnar stöðugt eða styrkist, og verðbólga hjaðnar eins og spáð er, ættu forsendur fyrir frekari slökun peningalegs aðhalds að vera áfram til staðar. Svigrúm peningastefnunefndarinnar til vaxtalækkunar verður þó takmarkað meðan veruleg óvissa ríkir um aðgengi Íslands að alþjóðlegum fjármálamörkuðum. Eins og ávallt er nefndin reiðubúin til að breyta aðhaldi peningastefnunnar eins og nauðsynlegt er með hliðsjón af því tímabundna markmiði hennar að stuðla að gengisstöðugleika og í því skyni að tryggja að verðbólga verði nálægt markmiði til lengri tíma litið.