Góð afkoma varð hjá Lánasjóðs sveitarfélaga ohf. í fyrra. mbl.is/hag

Ágæt afkoma var hjá Lánasjóðs sveitarfélaga ohf. á síðasta ári. Tekjuafgangur af rekstri sjóðsins var 1.656 m.kr. á móti 1.225 m.kr. árið áður. Háir vextir á innlendum markaði sem og mikil verðbólga skýra þessa góðu afkomu en eignir sem samsvara eigin fé sjóðsins eru að mestu bundnar í verðtryggðum útlánum. Ávöxtun á lausu fé var einnig framúrskarandi, en það var svo til allt varðveitt í Seðlabankanum.

Meginhlutverk sjóðsins er að tryggja sveitarfélögum, stofnunum þeirra og fyrirtækjum lánsfé á hagstæðum kjörum. Útborguð langtímalán á árinu 2009 voru 8.421 m.kr. miðað við 15.505 m.kr. á fyrra ári.

Sjóðurinn hefur ekki tapað útláni frá því að hann hóf starfsemi árið 1967 og engin vanskil voru í árslok 2009. Sveitarfélögin bera ekki ábyrgð á skuldbindingum sjóðsins, en tryggingar fyrir útlánum hans eru í tekjum sveitarfélaga skv. 3. mgr. 73. gr. sveitarstjórnarlaga nr. 45/1998, sbr. einnig reglugerð um tryggingar Lánasjóðs sveitarfélaga í tekjum sveitarfélags nr. 123/2006.

Eigið fé í árslok 2009 var 12.930 m.kr. á móti 11.273 m.kr. árið áður. Vegið eiginfjárhlutfall, svonefnt CAD-hlutfall, var í árslok 2009 67% en var 57% í árslok 2008, en þarf að vera 8% skv. lögum um fjármálafyrirtæki.