Hagnaður Landsvirkjunar á síðasta ári nam 193 milljónum Bandaríkjadala sem svarar til um 24,4 milljarða króna á núverandi gengi. Árið 2008 nam tap Landsvirkjunar 345 milljónum dala. Þrátt fyrir aukinn hagnað þá dregst rekstrarhagnaður (EBITDA) félagsins saman á milli ára, er 272 milljónir dala í fyrra en var 297 milljónir dala árið 2008.

Ársreikningur Landsvirkjunar var samþykktur á fundi stjórnar í dag.

Rekstrarhagnaður eða EBIT nam 157,3 milljónum dala að teknu tilliti til innleystra áhættuvarna eða sem nemur 46% af veltu, samkvæmt tilkynningu.

Handbært fé um áramót 194,2 milljónir dala

Mat á virði innbyggðra afleiða í tengslum við orkusölusamninga fyrirtækisins hækkaði um 253,3 milljónir dali á árinu 2009.

Handbært fé í árslok nam 194,2 milljónum dala en að auki hefur fyrirtækið aðgang að samningsbundnu veltiláni og er óádreginn hluti þess 281,6 milljónir dala.  Laust fé er því alls 475,8 milljónir dala eða sem nemur um 60 milljörðum króna sem ásamt fé frá rekstri dugar til að mæta öllum skuldbindingum fyrirtækisins inn á árið 2012, segir í tilkynningu frá Landsvirkjun.

Heildareignir Landsvirkjunar nema 4,8 milljörðum dala eða um 608 milljörðum króna á núverandi gengi.  Skuldir nema 3,2 milljörðum dala eða sem nemur um 410 milljörðum króna.

Eigið fé 1,56 milljarðar dala

Eigið fé Landsvirkjunar var 1,56 milljarðar dala eða sem svarar til um 198 milljarða króna á núverandi gengi.  Eiginfjárhlutfall var 32,6%.

„Horfur á árinu eru góðar.  Álverð er viðunandi um þessar mundir þó óvissa sé um þróun næstu missera.  Þá er vaxtastig á helstu mörkuðum afar lágt sem nýtist Landsvirkjun vel þar sem mikill meirihluti lána ber breytilega vexti.  Því standa vonir til að sjóðsmyndun verði góð um sinn. 

Afkoma fyrirtækisins mun sem fyrr ráðast að miklu leyti af gangvirðisbreytingum á innbyggðum afleiðum og gengisþróun.  Fyrirtækið hefur aðgang að lausafé og lánum sem ásamt fé frá rekstri mun tryggja að fyrirtækið getur mætt núverandi skuldbindingum sínum inn á árið 2012.  Stöðugt er unnið að endurfjármögnun og eru stjórnendur þess fullvissir að henni verði lokið fyrir þann tíma," segir í tilkynningu.

Landsvirkjun mun ekki ráðast í nýjar stórframkvæmdir nema að fjármögnun sé tryggð en stöðugt er unnið að endurfjármögnun eldri lána og fjármögnun nýrra orkuverkefna.  Fyrirspurnir og heimsóknir frá hugsanlegum orkukaupendum sýna að eftirspurn eftir raforku frá Landsvirkjun er mikil og vonast fyrirtækið eftir því að það skili sér í hærra orkuverði í nýjum sölusamningum.