Actavis

Helsti lánadrottinn Actavis, Deutsche Bank, hefur þjáðst af höfuðverk svo mánuðum skiptir vegna Actavis en nú er spurning um hvort bandaríska lyfjafyrirtækið Pfizer geti læknað bankann, skrifar blaðamaður Financial Times. Veltir FT því fyrir sér hvort Pfizer muni kaupa Actavis.

Deutsche Bank fjármagnaði yfirtöku Björgólfs Thors Björgólfssonar á Actavis árið 2007. Björgólfur keypti Actavis gegnum fjárfestingarfélag sitt, Novator, fyrir 3,62 milljarða evra og samkvæmt frétt Dow Jones fréttaveitunnar nýverið stendur bankinn  nú frammi fyrir því, að þurfa að afskrifa stóran hluta af láninu til Novator vegna þess að lánið sé hærra en markaðsvirði Actavis.

Bankinn gat leyst vandann í síðustu viku ef Actavis hefði orðið fyrir valinu hjá eigendum Ratiopharm. Niðurstaðan var hins vegar sú að ísraelska lyfjafyrirtækið Teva fær að kaupa þýska samheitalyfjafyrirtækið, Ratiopharm.

Í FT kemur fram að með sameiningu Actavis og Ratiopharm hefðu samlegðaráhrifin orðið það mikil að Deutsche hefði getað endurmetið stöðuna gagnvart Actavis.

En Actavis var ekki eina félagið sem varð undir í baráttunni við Teva því Pfizer sóttist einnig eftir því að kaupa Ratiopharm.

Segir í FT að staðan sé sú að Pfizer þurfi að eignast samheitalyfjafyrirtæki. Deutsche Bank þurfi að losna við Actavis og ekki hafi tekist að selja Actavis þrátt fyrir að það hafi verið reynt í átján mánuði.