Grikkir gefa út skuldabréf

Gríska ríkið mun gefa út skuldabréf fyrir marga milljarða evra í næstu viku, samkvæmt frétt Financial Times í dag. Er þetta gert í kjölfar samkomulags leiðtoga Evrópusambandsríkjanna frá því á fimmtudag að koma Grikkjum til bjargar.

Á fundinum náðu leiðtogar ESB-landanna samkomulagi um að evrulöndin og AGS myndu veita Grikklandi lán að andvirði allt að 22 milljarða evra ef landið fær ekki lán á viðráðanlegum kjörum á fjármálamörkuðum. Samkvæmt samkomulaginu kæmi þriðjungur lánanna frá Alþjóðagjaldeyrissjóðnum og tveir þriðju frá evrulöndum með tvíhliða samningum milli þeirra og Grikklands.

Kemur fram í frétt FT að Seðlabanki Grikklands muni reyna að fá fimm milljarða evra að láni með skuldabréfaútgáfunni.

Skuldatryggingaálag á gríska ríkið lækkaði í gær og var 6,193% seint í gærkvöldi sem þýðir að svo virðist sem markaðurinn hafi trú á samkomulaginu sem Angela Merkel, kanslari Þýskalands átti veg og vanda að. Fyrr á árinu var álagið komið í tæp 7%.

Merkel fékk því meðal annars framgengt að Alþjóðagjaldeyrissjóðurinn tæki þátt í aðstoðinni við Grikkland þrátt fyrir andstöðu Nicolas Sarkozy, forseta Frakklands, og fleiri ráðamanna á evrusvæðinu sem voru tregir til að senda þau skilaboð að eitt evrulandanna þyrfti að leita ásjár AGS.

Hins vegar fögnuðu evrópskir hlutabréfamarkaðir takmarkað í gær því helstu hlutabréfavísitölur í Evrópu lækkuðu í gær.