Höfuðstöðvar MP banka.

Tap MP banka nam 1180 milljónum króna á síðasta ári samanborið við 860 milljóna króna hagnað árið á undan. Er aðalástæðan fyrir tapinu miklar afskriftir útlána.  Bankinn segist telja sig geta skilað viðunandi afkomu á árinu 2010 þrátt fyrir afar slæmar aðstæður sem nú ríki og felist meðal annars í gjaldeyrishöftum, mikilli óvissu, auknum opinberum álögum á fjármálafyrirtæki og viðskiptavini þeirra og ógagnsæja samkeppni á fjármálamarkaði.

Í tilkynningu bankans segir, að reksturinn hafi gengið ágætlega á seinni hluta síðasta árs. Hagnaður af rekstri fyrir afskriftir seinni hluta ársins nam 243 milljónum samanborið við 213 milljóna tap fyrri hluta árs.

Þá hafi mikill en jafn vöxtur einkennt starfsemina. Afkoma af viðskiptabankastarfsemi hafi verið umfram væntingar, sérstaklega þegar tekið sé tillit til þess að starfsemin hafi verið byggð upp frá grunni og hófst ekki fyrr en um mitt ár.

Þá segir í tilkynningunni að afskriftir útlána séu stærsti einstaki liðurinn sem hafi áhrif á afkomu bankans en bankinn færði 1356 milljónir í afskriftarreikning. Afskriftir bankans á árinu 2009 séu vegna óbeinna afleiðinga bankahrunsins en ekki vegna nýrri lána. Bankinn hafi nú fært á afskriftareikning sem nemi jafnvirði 35% útlánasafns bankans m.v. september 2008. Sé þetta miklu hærri fjárhæð en búast mátti við enda hafi bankinn gripið til víðtækra varúðarráðstafana vegna ofþenslu íslensks efnahagslífs.

Heildareignir í árslok 2009 námu 62.567 milljónum króna og uxu um 9189 milljónir frá fyrra ári.  Eigið fé bankans nam 5040 milljónum og CAD hlutfall hans  var 14,9%.

„Bankinn mun sem fyrr hafa varfærni að leiðarljósi og að innviðir bankans geti stutt áframhaldandi vöxt bankans. Með nýjum tekjusviðum hafa styrkari stoðir verið settar undir rekstur bankans og dregið úr áhættu í starfsemi hans. Til stendur að dreifa eignarhaldi bankans og styrkja eiginfjárstöðu hans enn frekar. Því hefur hluthafafundur veitt stjórn heimild til að hækka hlutafé bankans um allt að 600 milljónir að nafnverði. Þegar hafa 100 milljónir af þeirri heimild verið nýttar," segir í tilkynningu MP banka.

Forstjórar með 30 milljónir í laun

Fram kemur í ársskýrslu MP banka, að Gunnar Karl Guðmundsson, forstjóri bankans, fékk 17,5 milljónir króna í laun á síðasta ári og Styrmir Þór Bragason, fyrrverandi forstjóri, 13,3 milljónir en forstjóraskipti urðu í maí. 

Laun Margeirs Péturssonar, stjórnarformanns, námu 6,8 milljónum króna og Sigfúsar Ingimundarsonar, varaformanns stjórnar, 2,4 milljónum. Stjórnarmennirnir Hallgrímur G. Jónason og Sigurður Gísli Pálmason, fengu 1,2 milljónir í laun og aðrir minna.