Reuters

Matsfyrirtækið Moody's segir nú að horfur fyrir lánshæfiseinkunn íslenska ríkisins séu neikvæðar vegna óvissunnar um erlenda lausafjárstöðu landsins en Moody's mat áður horfurnar stöðugar. Vísar Moody's til þeirra tafa, sem orðið hafi á lausn Icesave-deilunnar.

Einkunn Íslands er Baa3, sú lægsta sem telst til svonefnds fjárfestingarflokks. Horfum fyrir Baa2 þak á erlendar langtímaskuldbindingar og Baa3 þak á erlendar skammtímaskuldbindingar var einnig breytt í neikvæðar úr stöðugum.

Í tilkynningu Moody's er haft eftir Kenneth Orchard, einum af yfirmanni fyrirtækisins, að endurreisn íslenska efnahagskerfisins sé ógnað af Icesave-deilunni. Verði hún ekki leyst muni hún áfram verða Þrándur í Götu þess erlends fjármagns til landsins.

Orchard segir, að samningaviðræður Íslendinga við Breta og Hollendinga kunni að leiða til hagstæðari niðurstöðu fyrir Ísland en fyrra samkomulag. Hins vegar skaði óvissan efnahag Íslands til skamms tíma.  

Moody's vísar til óvissu um hvort íslensk stjórnvöld geti endurfjármagnað erlend evrulán, sem eru með gjalddaga í desember 2011 og maí 2012. Orchard segir, að Seðlabankinn ætti að hafa nægan gjaldeyrisforða til að endurgreiða þessi lán og raunar hafi bankinn keypt skuldabréfin á eftirmarkaði. Hins vegar ríki einhver óvissa um hvort staða Íslands eftir þessar endurgreiðslur uppfylli kröfur um fjárfestingarflokk. 

Moody's segir, að íslenska hagkerfið hafi staðið sig betur en búist var við árið 2009. Hins vegar sé líklegt að staðan á þessu ári verði verri en búist var við og hugsanlega muni hagkerfið dragast saman um 5%. Óvissan hafi það í för með sér að áformuð fjárfestingarverkefni í álframleiðslu og virkjunum muni tefjast. 

Þá segir Moody's, að íslensk stjórnvöld hafi nýlega tilkynnt að þau vilji að Alþjóðagjaldeyrissjóðurinn endurskoði efnahagsáætlun Íslands svo landið getið fengið þá lánafyrirgreiðslu, sem samið var um við sjóðinn og Norðurlöndin. Segir Moody's að Bretar og Hollendingar hafi stöðvað þessa endurskoðun frá því forseti Íslands neitaði að staðfesta Icesave-lögin í byrjun janúar.

„Moody's telur, að það væri jákvæð þróun ef hægt væri að halda áfram efnahagsáætlun Íslands en hún kann þó ekki að nægja til að halda Íslandi í fjárfestingarflokki, einkum ef lánin frá Norðurlöndunum fylgja ekki í kjölfarið.  

Moody's mun halda áfram að fylgjast með lausafjárstöðu Íslands og markaðsaðgangi. Við teljum líklegt, að niðurstaða fáist í Icesave-viðræðunum sem opnar á ný fyrir norrænu lánaáætlunina og þá verður horfunum á ný breytt í stöðugar. Svo gæti þó farið - þótt það sé ekki eins líklegt - að Íslandi takist ekki að fá eðlilegan lausafjáraðgang. Þá myndi lánshæfiseinkunnin væntanlega tekin til endurskoðunar með lækkun í huga."