YANNIS BEHRAKIS

Eftir Örn Arnarson ornarnar@mbl.is

Skuldatryggingaálagið á gríska ríkið til fimm ára varð í fyrsta sinn hærra en það íslenska frá því að viðskipti hófust með slíkar afleiður. Seinni partinn í gær var skuldatryggingaálagið á gríska ríkið komið í ríflega 410 punkta á meðan álagið á íslenska ríkið var í kringum 400 punkta. Álagið á íslenska ríkið hefur farið minnkandi að undanförnu og hefur ákvörðun matsfyrirtækisins Moody's í byrjun vikunnar um að skilgreina horfurnar á lánshæfismati ríkisins sem neikvæðar ekki breytt miklu þar um.

Þrátt fyrir fyrirheit um efnahagsaðstoð Evrópusambandsins og Alþjóðagjaldeyrissjóðsins á dögunum hefur óvissan á mörkuðum varðandi efnahagshorfur í Grikklandi og sjálfbærni skuldastöðu hins opinbera farið vaxandi. Ávöxtunarkrafan á grísk ríkisskuldabréf til tíu ára fór á ný yfir 7% í vikunni. Á sama tíma bárust fréttir af því að fjárlagahallinn í fyrra kunni hafa verið meiri en áætlað var. Slíkar fregnir kunna að auka almenna vantrú fjárfesta á áreiðanleika opinberra hagtalna í Grikklandi, en hún var djúpstæð fyrir, og magnar óvissu um hvort gríska ríkið geti fjármagnað núverandi hallarekstur og staðið í skilum á þeim gjalddögum sem falla á næstunni.

Eins og staða mála er skiptir sköpum hvernig ávöxtunarkrafan á grísk ríkisskuldabréf þróast. Hún er nú 400 punktum hærri en til að mynda krafan á þýsk ríkisskuldabréf. Grísk stjórnvöld hafa ítrekað lýst því yfir að undanförnu að slík fjármagnskjör geri það að verkum að aðhaldsaðgerðir þeirra til þess að koma böndum á hallarekstur og skuldasöfnun hins opinbera verði til einskis þar sem auknar vaxtagreiðslur af skuldum vega upp á móti aðhaldsaðgerðunum.

Segja má að þróunin á markaðnum með grísk skuldabréf eftir páska sé til marks um að fjárfestar vilji nánari útlistanir á því hvernig Evrópusambandið muni útfæra efnahagsaðstoð handa grískum stjórnvöldum. Óvissan kringum þá útfærslu hefur farið vaxandi, ekki síst vegna þeirrar staðreyndar að óeining virðist vera uppi um á hvaða kjörum slík efnahagsaðstoð yrði veitt.

Fram hefur komið í fjölmiðlum að þýsk stjórnvöld standi fast á þeirri skoðun að neyðarlánveiting til grískra stjórnvalda ætti að vera á kjörum sem endurspegla viðskipti á markaði. Það er að segja á bilinu 6 til 6,5%, en hækkunin á ávöxtunarkröfunni síðustu daga átti sér stað eftir að fréttir bárust um þessa óeiningu innan raða ESB. Eins og fram kemur í Financial Times eru önnur ríki reiðubúin að veita grískum stjórnvöldum lán á bilinu 4 til 4,5% sem er sambærilegt við þau markaðskjör sem skuldsettum evruríkjum á borð við Írland og Portúgal standa til boða um þessar mundir.

Ljóst er að titringurinn á mörkuðum mun ekki minnka á meðan þessi deila stendur óleyst. Þýsk stjórnvöld muni ráða miklu um á hvaða kjörum grískum stjórnvöldum yrði veitt efnahagsaðstoð þar sem þau myndu þurfa að standa straum af stærstum hluta upphæðarinnar. Leiða má líkur að því að stjórnvöld í Berlín hafi lítinn hug á því að niðurgreiða lánveitingar til Grikklands, ekki síst í ljósi þeirra skilaboða sem það myndi senda til annarra skuldsettra evruríkja.

Það blasir við því að ókyrrðin á evrusvæðinu vegna efnahagsþrenginga Grikklands er langt frá því að vera yfirstaðin og reikna má með að skjálftavirkni á mörkuðum fari vaxandi.