Krónan styrkst um 6% gagnvart evru
Gengi krónunnar hefur styrkst um 6% gagnvart evru mbl.is
Gengi krónunnar gagnvart evru var tæplega 176 kr. að meðaltali á fyrsta ársfjórðungi þessa árs og hafði styrkst um 4% frá fyrri ársfjórðungi en síðasta spá gerði ráð fyrir að gengi evru héldist nánast óbreytt frá fjórðungnum á undan, í rúmlega 183 kr.
Þessi styrking varð án nokkurra inngripa Seðlabankans á gjaldeyrismarkaði en bankinn hefur ekki komið inn á markaðinn frá því snemma í nóvember á síðasta ári.
Gengisstyrkingin endurspeglar að nokkru leyti lækkun á gengi evru og punds gagnvart öðrum gjaldmiðlum, að því er segir í Peningamálum.
Viðskiptakjör hafa einnig batnað, viðskiptaafgangur aukist og gjaldeyrishöftin virðast halda betur en áður. Líklegt er að höftin hafi komið í veg fyrir að tímabundin hækkun áhættuálags á innlendar fjáreignir að undanförnu veiktu krónuna.
Styrking krónunnar að undanförnu og áframhaldandi hjöðnun ársverðbólgu á fyrsta ársfjórðungi hafa gert peningastefnunefnd Seðlabankans kleift að halda áfram lækkun vaxta. Frá útgáfu Peningamála í janúar hefur nefndin tvisvar fundað og lækkað vexti bankans um hálfa prósentu í hvort skipti.
Útlit er fyrir að viðskiptakjör muni batna töluvert á þessu ári og því næsta. Þegar er kominn töluverður afgangur á vöru- og þjónustuviðskiptum og á viðskiptajöfnuði, þegar frá eru talin vaxtagjöld sem tengjast uppgjöri innlánsstofnana í slitameðferð.
Gert ráð fyrir að evran verði 167 krónur á næsta ári
Til lengri tíma litið virðast því efnahagslegar forsendur hægfara styrkingar á gengi krónunnar vera fyrir hendi. Gert er ráð fyrir svipaðri gengisþróun og í janúarspánni, þótt útlit sé fyrir að gengið verði heldur sterkara en þá var talið.
Í spánni nú er gert ráð fyrir að gengi krónunnar verði rúmlega 167 kr. gagnvart evru á árinu 2012 sem er rúmlega 3% hærra gengi en áætlað var í janúar.
