Öll stærstu fyrirtæki Íslands á sviði steinsteypuframleiðslu hafa nú lent í fanginu á kröfuhöfum. Nú síðast var BM Vallá tekið til gjaldþrotaskipta. Áður hafði Íslandsbanki tekið yfir Steypustöðina, fyrir tæpum tveimur árum. Loftorka í Borgarnesi óskaði eftir gjaldþrotaskiptum í júní á síðasta ári, en hefur nú verið endurreist með aðkomu nýrra fjárfesta. Greint var frá því í gær að NBI og Arion banki hefðu skipt á milli sín rekstrareiningum BM Vallár. Eins og vanalega kemur fram í tilkynningum bankanna þegar þeir taka yfir fyrirtæki er ætlunin að selja rekstrareiningarnar sem fyrst.

BM Vallá hefur nú um skeið verið í greiðslustöðvun. Vísbendingar eru um að félagið hafi stundað að undirbjóða keppinauta sína ríflega á greiðslustöðvunartímabilinu. Morgunblaðið hefur undir höndum gögn sem sýna að BM Vallá bauð 15% lægra verð en næstlægsta boð í nýlegu útboði. Þess ber þó að geta að Morgunblaðið hefur aðeins gögn undir höndum um þetta eina útboð.

Keyptu af skiptastjóra

Tæpum mánuði eftir að Loftorka í Borgarnesi var tekin til gjaldþrotaskipta samdi hópur fjárfesta við skiptastjóra félagsins um kaup á rekstri, tækjum og birgðum félagsins. Fjárfestahópurinn var samsettur af nokkrum starfsmönnum og fyrrverandi eiganda sem hafði áður selt fyrirtækið frá sér. 45 starfsmenn voru ráðnir til fyrirtækisins á ný eftir kaupin.

Steypustöðin of dýr?

Íslandsbanki tilkynnti í nóvember síðastliðnum að Steypustöðin yrði sett í söluferli. Í kjölfarið bárust bankanum tilboð, og einhverjir tilboðsgjafa gengu til áframhaldandi viðræðna við bankann. Steypustöðin hefur hins vegar ekki verið seld, en heimildir Morgunblaðsins herma að Íslandsbanki hafi viljað helst til hátt verð fyrir Steypustöðina. Eftir því sem næst verður komist vildi bankinn á bilinu 700-900 milljónir fyrir Steypustöðina. Fyrirtækið hefur ekki skilað ársreikningi fyrir 2009, en á árinu 2008 nam rekstrarhagnaður Steypustöðvarinnar fyrir fjármagnsliði rúmlega 24 milljónum.