Forstjóri bresku verslunarkeðjunnar Iceland Food, Malcolm Walker, vill ekki tjá sig um orðróm sem er um að hann hafi hug á að eignast keðjuna sem nú er að mestu í eigu íslenska ríkisins eftir að Baugur fór í gjaldþrot.  Er þessi orðrómur ekki nýr af nálinni en hann blossaði upp um svipað leyti og íslensku bankarnir féllu haustið 2008.

Walker stofnaði keðjuna á sínum tíma og þegar Baugur Group, Fons og fleiri fjárfestar eignuðust keðjuna á sínum tíma fengu þeir Walker til þess að stýra rekstrinum. Walker á einnig hlut í keðjunni. Hann segist telja að matvörukeðjan sé verðmætasta eign Íslands. 

„Þeir eiga í vandræðum með að ákveða hvað þeir eiga að gera við okkur," segir Walker í viðtali við This is Money vefinn.

Í nóvember í fyrra sagði Jón Ásgeir Jóhannesson að Walker væri meðal þeirra fjárfesta sem vildu kaupa Haga með honum og föður hans, Jóhannesi Jónssyni.

Walker sagði á þeim tíma í samtali við blaðamann Morgunblaðsins að  Jón Ásgeir hafi komið að máli við sig og spurt hvort hann vildi hjálpa honum og kaupa hlut í Högum. Hann hafi verið jákvæður en ekki tekið neina ákvörðun enn.

Í fréttaskýringu sem birt var í Morgunblaðinu í febrúar kom fram að í apríl 2007 seldi Icebox Holding öll hlutabréf Iceland til Iceland Food Stores Limited á 560 milljónir punda. Landsbankinn lánaði fyrir helmingi kaupverðs en bæði félög voru í eigu sömu aðila.

Icebox   Holding, sem var eignarhaldsfélag í eigu Baugs Group, Fons, Milestone og stjórnenda Iceland utan um Iceland-verslanakeðjuna, hagnaðist um 280 milljónir punda þegar verslanakeðjan Iceland var seld til annars félags í þeirra eigu. Félagið Iceland Food Stores Limited, sem var einnig í eigu hluthafa Icebox Holding, keypti félagið á 560 milljónir punda í apríl 2007, en Landsbankinn fjármagnaði kaupin að hálfu. Rekstur Iceland var skuldlaus á þessum tíma, en eftir að Iceland Food Stores Limited keypti þyngdist skuldabyrðin umtalsvert, eða um 280 milljónir punda.

Greint var frá því á forsíðu viðskiptahluta Fréttablaðsins þann 11. apríl 2007 að eigendur Iceland hefðu fengið 39 milljarða króna greidda í arð. Ljóst er að Landsbankinn fjármagnaði þá arðgreiðslu að fullu. Á þeim tíma sem gerningurinn átti sér stað átti Baugur 31% í Iceland og fékk 12 milljarða í sinn hlut, Fons átti 25% og fékk 11,3 milljarða, Milestone átti 10% og fékk 3,9 milljarða. Loks áttu Malcolm Walker og aðrir stjórnendur um 20% og fengu 7,8 milljarða króna. Í kjölfar færslunnar á Iceland-rekstrinum til Iceland Food Stores Limited minnkaði Walker lítillega við sig í félaginu, en aðrir stjórnendur auk Fons juku sinn hlut á móti.

Rekstur Iceland gekk afar vel á þessum tíma, en félagið hafði greitt niður allar skuldir og safnað 100 milljarða eigin fé á þegar salan frá Icebox fór fram.

 Hér er hægt að lesa meira um málið