mbl.is/Golli

Hrein eign lífeyrissjóðanna til greiðslu lífeyris nam 1.874 milljörðum króna í lok apríl síðastliðins og jókst um 16 milljarða króna í mánuðinum skv. tölum sem Seðlabankinn hefur birt. Það jafngildir um 1% aukningu frá fyrri mánuði.

Þetta er lítil aukning miðað við það sem sést hefur undanfarna mánuði, en hrein eign lífeyrissjóðanna hefur að meðaltali aukist um 21 milljarð króna hvern mánuð undanfarið hálft ár, að því er fram kemur í Morgunkorni Greiningar Íslandsbanka.

„Þrátt fyrir þann mikla skell vegna lífeyrissjóðirnir urðu fyrir vegna hlutabréfaeignar og eignar banka- og fyrirtækjaskuldabréfa í kjölfar hrunsins eru sjóðirnir enn ótrúlega stórir í alþjóðlegu samhengi. Nam hrein eign þeirra í marslok 125% af vergri landsframleiðslu síðasta árs

Erlendar eignir sjóðanna drógust saman um 420 m. kr í aprílmánuði en eignir í innlendum skuldabréfum og verðbréfasjóðum jukust um 7 ma.kr. Mest munar þar um að eign lífeyrisjóðanna í innlendum íbúðabréfum jókst um 9 ma.kr. Þar hefur einhver áhrif 0,55% hækkun vísitölu neysluverðs í marsmánuði. Þá jukust eignir lífeyrissjóðanna í innlendum hlutabréfum og hlutabréfasjóðum um 2,5 ma. kr.

Í lok apríl síðastliðins hafði hrein eign lífeyrissjóðanna hækkað um 245 ma.kr. frá sama tíma fyrir ári, sem jafngildir hækkun upp á 15% að nafnvirði. Sé tekið tillit til verðbólgu nemur hækkunin 6,2%. Þar verður þó að hafa í huga að iðgjaldagreiðslur inn í lífeyrissjóði eru til muna hærri en lífeyrisgreiðslur og útflæði vegna innlausnar séreignarsparnaðar. Raunávöxtun sjóðanna er því mun minni en framangreind tala gefur til kynna," segir í Morgunkorni Íslandsbanka.