Sérbýli lækkar í verði
mbl.is
Verð á sérbýli lækkaði í verði á höfuðborgarsvæðinu í maí um 5,8% og er það í fyrsta skipti á árinu sem verð á sérbýli lækkar, samkvæmt Morgunkorni Greiningar Íslandsbanka. Fjölbýli hækkar hins vegar í verði um 4%, samkvæmt vísitölu íbúðaverðs sem Fasteignaskrá Íslands tekur saman.
„Þetta er í fyrsta sinn á þessu ári sem sérbýli lækka í verði á milli mánaða en þar til nú í maí höfðu þau hækkað um tæplega 10% frá áramótum talið. Hér er það mikil fæð kaupsamninga sem skapar gríðarlega óvissu í mælingum, en mjög strjál viðskipti eru með sérbýli á höfuðborgarsvæðinu um þessar mundir.
Í árferði líkt og því sem nú ríkir eru það aðallega litlar fjölbýlisíbúðir sem ganga kaupum og sölum á meðan stærri og dýrari eignir eru tregari í sölu enda erfitt að fjármagna slík kaup með nýjum lántökum um þessar mundir.
Auk þess leitast fólk við að minnka við sig í slæmu árferði og því alltaf tiltekin grunneftirspurn eftir smærri eignum. Fjölbýli hafa nú hækkað um 2% í verði frá áramótum talið, sérbýli um 3,5% og íbúðaverð á höfuðborgarsvæðinu í heildina hefur hækkað um 2,3% frá upphafi þessa árs.
Mörgum kann að þykja skjóta skökku við að íbúðaverð hækki nú þar sem aðstæður á íbúðamarkaði eru enn með mótdrægara móti. Spurn eftir húsnæði er í lágmarki vegna erfiðra aðstæðna í hagkerfinu og þá bíður á hliðarlínunni verulegt framboð af nýju óseldu húsnæði.
Þannig má reikna með að frekari lækkun íbúðaverðs sé í pípunum en Seðlabankinn gerir til að mynda ráð fyrir að íbúðaverð muni enn fara lækkandi fram á næsta ár. Reyndar hefur íbúðaverð hækkað og lækkað á víxl samkvæmt mælingum Fasteignaskrár Íslands allt frá áramótum talið. Líklegt er að mælitækin séu að gefa villandi mynd en eins og Seðlabankinn hefur bent á er ákveðinn mælingarvandi hér á ferðinni þar sem fæð kaupsamninga um húsnæði gerir það að verkum að óvissa er mikil.
Undanfarna 12
mánuði hefur íbúðaverð á höfuðborgarsvæðinu lækkað í verði um 1% að
nafnvirði og um 10% að raunvirði. Frá hruninu hefur íbúðaverð á
höfuðborgarsvæðinu lækkað um 30% að raunvirði," segir í Morgunkorni Greiningar Íslandsbanka.
