Viðskipti | mbl | 24.6.2010 | 11:49

Gæti kostað kröfuhafa hundruð milljarða

Gylfi Magnússon, efnahags- og viðskiptaráðherra, segir í samtali við Bloomberg fréttastofuna að hætta sé á að kröfuhafar bankanna tapi hundruð milljörðum króna ef allt fer á versta veg fyrir fjármálastofnanir í kjölfar niðurstöðu Hæstaréttar varðandi gengistryggðu lánin.

Stjórnvöld eigi á hættu að tapa hundrað milljörðum króna vegna málsins. Það sé sú fjárhæð sem íslensk stjórnvöld hafa sett inn í bankana en ekki sé tekið tillit til þess hversu mikið nýtt fé ríkið þarf að setja inn í fjármálafyrirtækin ef niðurstaðan verður sú að vextir af lánunum séu í samræmi við það sem fram kemur í lánasamningum.

Önnur kreppa yfirvofandi

Segir í frétt Bloomberg að Ísland eigi jafnvel yfir höfði sér aðra kreppu í kjölfar dóms Hæstaréttar.

Oddgeir A. Ottesen, hagfræðingur hjá IFS Greiningu, segir í samtali við Bloomberg að hann geti ekki ímyndað sér að íslenska bankakerfið muni lifa það af ef öll lán í krónum sem tengd eru erlendri mynt verði dæmd ólögleg.