Þýski fasteignalánabankinn Hypo Real Estate, sem fór mjög illa út úr fjármálakreppunni, verður rekinn með tapi í ár en vonast stjórnendur bankans að undir lok árs verði hann farinn að skila hagnaði. Áður töldu stjórnendur hans að tap yrði á rekstrinum til ársins 2012 hið minnsta. Bankinn var þjóðnýttur í fyrra.

Á fyrri hluta ársins 2010 nam tap HRE 700 milljónum evra, 107,7 milljörðum króna, en á sama tímabili í fyrra nam tapið 1,1 milljarði evra. HRE bankinn var eini þýski bankinn sem ekki stóðst álagspróf Evrópusambandsins. Hafa stjórnendur HRE sagt að bankinn þurfi á tveimur milljörðum evra til viðbótar við þá 7,85 milljarða evra sem þýsk stjórnvöld hafa sett í bankann í gegnum sjóðinn SoFFin, til þess að rekstur hans sé í lagi. SoFFin hefur jafnframt veitt bankanum 103,5 milljarða evra lánatryggingu.