Tap á rekstri Skipta á fyrri hluta árs nam 6 milljónum króna. Tap á sama tímabili árið 2009 var 2088 milljónir króna. Sölutekjur námu 19,6 milljörðum króna samanborið við 19,8 milljarða á sama tímabili árið áður sem er 0,6% samdráttur.

Rekstrarhagnaður fyrir afskriftir og fjármagnsliði  nam 3,7 milljörðum króna samanborið við 4,2 milljarða fyrir sama tímabil 2009. Handbært fé frá rekstri án vaxta og skatta nam 3,6 milljörðum króna samanborið við 4,2 milljarða á sama tímabili árið áður. Eftir vexti og skatta nam handbært fé frá rekstri 1,7 milljörðum króna.

Brynjólfur Bjarnason, forstjóri Skipta, segir í tilkynningu að bætt afkoma skýrist fyrst og fremst af betri niðurstöðu fjármagnsliða. Afkoman nú sýni hversu traustur undirliggjandi rekstur félagsins sé.

Fjármagnsgjöld voru 1,7 milljarðar króna en þar af nam gengishagnaður 0,6 milljörðum króna. Vaxtaberandi skuldir að frádregnum innistæðum (nettó vaxtaberandi skuldir) námu 54,2 milljörðum króna við lok tímabilsins en voru 54,4 milljarðar króna í byrjun ársins og hafa því lækkað um 0,2 milljarð króna á tímabilinu.

Eigið fé Skipta er 24,5 milljarðar króna og eiginfjárhlutfall er 21,2%.

Skipti hafa selt upplýsingatæknifyrirtækið Sirius IT. Gengið var frá sölunni í júlí, og munu áhrifin af sölunni að mestu koma fram á seinni árshelmingi 2010, en þá bókfærist 3,3 milljarða króna söluhagnaður vegna viðskiptanna.

Brynjólfur segir, að Skipti muni í kjölfar sölunnar greiða skuldir niður hraðar en áætlað var, alls um 8,5 milljarða króna af lánum félagsins. Skipti áttu að auki í lok júní um 16,6 milljarða króna í reiðufé, svo félagið hafi umtalsvert svigrúm til að greiða niður skuldir.