Peningastefnunefnd Seðlabanka Íslands: Þórarinn G. Pétursson, Anne Sibert, Már Guðmundsson seðlabankastjóri, sem er formaður nefndarinnar, Arnór Sighvatsson og Gylfi Zoëga

Eftir að hafa rætt þann möguleika að lækka stýrivexti um 0,5 til 1,5 prósentur var Peningastefnunefnd Seðlabankans samhljóða í ákvörðun um eins prósentustigs lækkun vaxta á vaxtaákvörðunarfundi sínum þann 16. - 17. ágúst síðastliðinn.

Voru nefndarmenn einnig sammála um að forsendur væru til þess að draga áfram smám saman úr peningalegu aðhaldi, að því gefnu að gengi krónu veiktist ekki að nýju og verðbólga héldi áfram að hjaðna í takti við spár. Þetta kemur fram í fundargerð nefndarinnar sem birt var í gær.

Telja má líklegt að vextir Seðlabankans verði lækkaðir á næsta vaxtaákvörðunardegi, 22. september næstkomandi, miðað við þær skoðanir sem fram koma í fundagerðinni sem og þróuninni frá þeim tíma, að því er fram kemur í Morgunkorni Greiningar Íslandsbanka.

Þannig hefur tólf mánaða verðbólga minnkað úr 4,8% í 4,5% frá síðustu vaxtaákvörðun og gengi krónunnar verið nokkuð stöðugt.

„Þó er margt sem gæti takmarkað svigrúm peningastefnunefndar. Í fyrsta lagi má nefna að afar ólíklegt er, miðað við það sem á undan er gengið, að draga muni úr óvissu tengdri Icesave málinu fyrir næstu vaxtaákvörðun þrátt fyrir að formlegar umræður um málið séu við það að hefjast.

Í öðru lagi er óvíst hvort þriðja endurskoðun áætlunar AGS verði í höfn fyrir þann tíma, en íslensk stjórnvöld höfðu vonast til þess að hún yrði tekin fyrir hjá framkvæmdastjórn AGS í byrjun þessa mánaðar. Á hinn bóginn gæti dómur Hæstaréttar um lögmæti gengistryggða lána legið fyrir á næsta vaxtaákvörðunardegi, sem ætti þá að varpa ljósi á fjárhagslegan styrkleika fjármálakerfisins," segir í Morgunkorni.

Sammála um að vextir væru nokkuð háir

Nefndarmenn voru sammála um að vextir Seðlabankans væru fremur háir miðað við verðbólguhorfur og að svigrúm væri til áframhaldandi lækkunar. Litu nefndarmenn svo á að færi væri á meiri vaxtalækkun en að jafnaði undanfarið ár þar vegna minni verðbólgu, lægri verðbólguvæntingar, sterkara gengi krónunnar og svo að horfur væru á hraðari hjöðnun verðbólgu en áður. Þó er ekki enn ljóst að hve miklu leyti hjöðnun verðbólgunnar undanfarið skýrðist af tímabundnum þáttum og kölluðu því aðrir þættir á varfærnara skref.