Íslenska hagkerfið seinna á fætur
Einkaneysla dróst saman um 3,2% Reuters
Tölur Hagstofu Íslands um landsframleiðslu sem birtar voru í morgun benda til þess að íslenska hagkerfið ætli að vera seinna að rísa á fætur en hagkerfin í kringum okkur, en til samanburðar var hagvöxtur 1% á evrusvæðinu á milli fyrsta og annars ársfjórðungs þessa árs og í Bandaríkjunum varð 0,4% hagvöxtur á sama tímabili.
Þetta kemur fram í Morgunkorni Greiningar Íslandsbanka.
Afleiðingar kreppunnar meiri hér
„Ekki þarf þó að koma á óvart að það taki Ísland lengri tíma að ná bata þar sem hin alþjóðlega bankakreppa hafði umtalsvert meiri afleiðingar hér á landi en víðast hvar. Engu að síður skal haft í huga að þessar tölur Hagstofunnar eru ekki endanlegar en miklar breytingar verða oft á þessum tölum á milli endurskoðana. Varlega verður því að fara í túlkun þeirra," segir í Morgunkorni.
Sultarólin enn við lýði
Það sem veldur miklum samdrætti landsframleiðslu á öðrum ársfjórðungi í ár er m.a. mikill samdráttur einkaneyslu á milli fjórðunga. Þannig dróst einkaneysla saman um 3,2% frá fyrri fjórðungi sem er mun meiri samdráttur en sést hefur á undanförnum fjórðungum.
„ Um er að ræða stærsta undirlið landsframleiðslunnar og áhrif hans því mikil. Samdráttur í einkaneyslu virðist því eitthvað ætla að dragast á langinn og landsmenn eru greinilega ekki búnir að losa endanlega um sultarólina þrátt fyrir allt.
Innlend eftirspurn virðist samkvæmt þessu enn vera að dragast saman. Tölur um innflutning styðja þetta, en innflutningur dróst saman um 5,1% frá fyrri fjórðungi sem rekja má til þess að vöruinnflutningur dróst saman um 10,1%.
Þá dróst fjárfesting saman um 4,7% frá fyrri fjórðungi. Loks drógust birgðir saman um rúma 10 ma.kr. á öðrum ársfjórðungi og munar þar mestu um minni birgðir sjávarafurða. Útflutningur á öðrum fjórðungi jókst um 2,8% frá fyrri fjórðungi og munar þar mestu um 5,1% aukningu í þjónustuútflutningi. Samneysla jókst um 1% frá fyrri fjórðungi en þetta er í fyrsta sinn í fimm ársfjórðunga sem samneysla hefur aukist. Í ljósi þess að aukið aðhald hefur verið boðað í ríkisfjármálum er þó líklegt að frekari samdráttur á því sviði sé í spilunum," segir ennfremur í Morgunkorni.
