Þrotabú danska fjárfestingarfélagsins Stones Invest hefur höfðað skaðabótamál gegn Steen Gude, aðaleiganda félagsins og stjórn þess og krefst 271 milljónar danskra króna, nærri 5,6 milljarða íslenskra króna, í bætur.

Steen Gude byggði upp Stones Invest á skömmum tíma og var félagið í margskonar starfsemi.  Það var hins vegar íslenska fasteignafélagið Landic Property sem krafðist gjaldþrotaskipta í september 2008. Þá kom fram að Stones Invest skuldaði 4 milljarða danskra króna.

Danska fréttastofan Ritzau segir, að Stones Invest hafi átt fjölda fasteigna og fyrirtækja þegar félagið varð gjaldþrota. Landic Property seldi Stones Invest meðal annars félagið Keops Development á árinu 2008 en tók það síðan yfir á ný vegna vanefnda Stones. 

Ritzau segir, að rannsókn þrotabúsins hafi leitt í ljós, að Gude og stjórn Stones hafi gert upp á milli kröfuhafa þegar ljóst var að fyrirtækið var á leið í þrot.  Þá hafi Gude reynt að selja eignir til valdra einstaklinga.