Smásölukeðjan Hagar tapaði 2,5 milljörðum króna vegna fjárfestingar í hlutabréfum FL Group. Þetta segir Finnur Árnason, forstjóri Haga, í samtali við Morgunblaðið.

Fram kemur í ársreikningi Haga fyrir reikningsárið sem endaði í febrúar síðastliðnum að talsverðar niðurfærslur hafi verið gerðar vegna fjárfestinga Haga. Finnur segir að kaupin á FL Group-bréfunum hafi verið gerð á árinu 2007. Aðaleigendur Haga og FL Group voru hinir sömu á þeim tíma sem viðskiptin áttu sér stað. Finnur segir Haga hafa fjárfest í ýmsu á uppsveifluárum, enda almenn bjartsýni ríkjandi á Íslandi á þeim tíma.

Í ársreikningnum kemur einnig fram að Hagar hafi keypt eigin bréf af stjórnendum félagsins fyrir 315 milljónir króna. Viðskiptin áttu sér stað í október 2009, eða um það leyti sem Arion banki tók yfir 1998 ehf., móðurfélag Haga, að því er fram kemur í viðskiptablaði Morgunblaðsins í dag.