Kaupverð FIH 4-6 milljarðar danskra króna
Höfuðstöðvar FIH við Langelinie Allé í Kaupmannahöfn.
Danska viðskiptablaðið Børsen hefur í dag eftir sérfræðingum, að kaupverðið á bankanum FIH Erhvervsbank, sem nú er í söluferli, geti verið milli 4-6 milljarðar danskra króna, jafnvirði 80-120 milljarða íslenskra króna. Bankinn er í umsjá skilanefndar Kaupþings.
Blaðið hefur eftir sérfræðingum að gangverð á bönkum sé nú á bilinu 0,4 til 1% af innra virði þeirra. Eigið fé FIH sé nú um 10 milljarðar króna en bankinn hafi lengi verið til sölu og seljist því varla nú á hæsta mögulega verði. Á móti komi, að tveir fyrirtækjahópar berjist nú um bankann.
Um er að ræða annars vegar lífeyrissjóðina ATP og PFA og hins vegar breska fjárfestingarsjóðinn Triton í samvinnu við fimm danska lífeyrissjóði: AP Pension, PKA, Industriens Pension, Pension Danmark og Sampension.
Børsen segir, að gert sé ráð fyrir að söluferlinu geti lokið á næstu vikum og nýir eigendur gætu því tekið við bankanum um næstu mánaðamót. Blaðið segir, að ástæðan fyrir því að bankinn er seldur nú sé ótti við, að hugsanlega verði gert áhlaup á hann þegar svonefndur Bankpakke 1 rennur út. Þá fellur niður ótakmörkuð ábyrgð danska ríkisins á innistæðum í þeim bönkum, sem nýttu sér þessa aðstoð eftir að fjármálakreppan skall á.
Kaupþing,
sem þá hét KB banki, festi kaup á FIH um mitt sumar 2005. Kaupverðið þá
var 84 milljarðar króna. Þá var gengi krónunnar mun hærra skráð og því
greiddi Kaupþing sem nam rúmlega einum milljarði evra fyrir öll
hlutabréf í FIH, en stærsti eigandi bankans var Swedbank.
Kaupþing veðsetti allt hlutafé FIH hjá Seðlabanka Íslands á haustmánuðum 2008 gegn 500 milljóna evra neyðarláni. Það svarar til 75 milljarða króna á núverandi gengi. Skilanefnd Kaupþings hefur formleg yfirráð yfir FIH, en þau veðbönd sem hvíla á bankanum orsaka að stærstur hluti söluverðsins mun renna til Seðlabanka Íslands, sem tók raunar allsherjarveð í FIH. Því munu skuldir vegna allrar lausafjárfyrirgreiðslu sem Seðlabankinn kann að hafa veitt Kaupþingi í krónum, verða greiddar ef söluverðmæti FIH verður nægilega hátt.
FIH var á síðasta ári rekinn með 147 milljóna danskra króna tapi fyrir
skatta. Í frétt TV2 kemur fram að tapreksturinn megi að miklu leyti
rekja til niðurfærslna á lánum fyrir 1,2 milljarða evra, en
undirliggjandi rekstur bankans er talinn afar sterkur. FIH er sjötti
stærsti banki Danmerkur.
