Litlar breytingar á skuldatryggingaálagi
. mbl.is
Skuldatryggingarálag á evruskuldir ríkissjóðs Íslands hefur verið nokkuð stöðugt upp á síðkastið. Í lok dags í gær stóð álagið í 315 punktum (3,15%) samkvæmt gögnum úr Bloomberg-gagnaveitunni sem er á svipuðu róli og það hefur verið síðasta mánuðinn.
Þegar skoðuð er þróunin frá upphafi árs kemur í ljós að skuldatryggingarálag ríkissjóðs hefur lækkað talsvert en ekki er hægt að segja hið sama um meðaltal ríkja í Vestur Evrópu, segir í Morgunkorni Íslandsbanka.
Í raun hefur hið gagnstæða verið að gerast á
markaði með skuldatryggingar á evrópsk ríki og hefur meðaláhættuálag á
ríki í Vestur Evrópu verið að mjakast upp á við.
„Hækkun á meðaláhættuálaginu undanfarið má m.a. rekja til Írlands. Þannig stóð álagið á írska ríkið í byrjun ágúst síðastliðinn í 209 punktum en í lok dags í gær var það komið upp í 371 punkt sem er annað hæsta álagið á meðal þeirra ríkja í Vestur Evrópu sem seldar eru skuldatryggingar fyrir.
Þessi mikla hækkun á álaginu á írska ríkið kemur þó ekki alls kostar á óvart enda hefur ríkið legið undir mikilli gagnrýni vegna aðkomu þess að bankakerfinu. Eins og kunnugt er tók írska ríkið gríðarlegar skuldir á sig til þess að bjarga bankakerfinu.
Af þessum sökum hefur lánshæfismat írska ríkisins versnað þó nokkuð undanfarið. Síðast lækkaði matsfyrirtækið Standard & Poor¿s (S&P) lánshæfiseinkunn þess fyrir langtímaskuldbindingar í AA-. Írska ríkið hefur sömu einkunn hjá matsfyrirtækinu Fitch en einkunn þess hjá Moody´s er svo þrepi hærra.
Fyrir hrun hafði írska ríkið hæstu lánshæfiseinkunn hjá þessum þremur matsfyrirtækjum," segir í Morgunkorni.
Þrátt fyrir að skuldatryggingarálagið á írska ríkið sé töluvert hærra en álagið á hið íslenska er lánshæfismat hins fyrrnefnda mun betra. Fyrir langtímaskuldbindingar í erlendri mynt eru einkunnir Íslands lægstar í bókum Fitch, þ.e. BB+, sem er þrepi neðar en einkunnir landsins, þ.e. BBB-Baa3, hjá Fitch og Moody´s.
„Eru lánshæfiseinkunnir íslenska ríkisins þar með 6 til 7 þrepum lægri en einkunnir hins írska og er nokkuð ljóst að þessir tveir mælikvarðar á áhættu eru á öndverðum meiði um innbyrðis lánshæfisáhættu ríkjanna tveggja.
Auk þess eru lánshæfiseinkunnir íslenska ríkisins á neikvæðum horfum í bókum allra fyrirtækjanna á meðan einkunnir írska ríkisins eru á neikvæðum horfum hjá S&P en stöðugar í bókum hinna tveggja," segir í Morgunkorni Íslandsbanka.
