Þegar Talden Holding, dótturfélag Fons, seldi Fons allar sínar eignir síðla árs 2007 var síðarnefnda félaginu veitt svokallað seljendalán fyrir tæplega 217 milljónir punda.

Þetta kemur fram í ársreikningi Taldem Holding fyrir árið 2007, sem var skilað inn til fyrirtækjaskrár Lúxemborgar 14. nóvember 2008. Rúmlega tveimur vikum síðar, eða 1. desember 2008, berst fyrirtækjaskránni síðan tilkynning þess efnis að slíta eigi félaginu Talden Holding. Það félag var í eigu Melkots ehf., sem var aftur í eigu Fons. Í tilkynningu sem Pálmi Haraldsson, annar aðaleigenda Fons, sendi frá sér í gær, segir að í kjölfar þessara viðskipta hafi Melkot eignast fjárkröfu á Fons, sem var aftur 100% eigandi Melkots.

Í tilkynningu Pálma segir að afleiðing þessara viðskipta hafi verið að Fons eignaðist erlendar eignir Talden, með því að greiða félagi í sinni eigu 25 milljarða króna á þávirði. Hagnaður Talden á árinu 2007 var síðan 27,5 milljarðar króna á þáverandi gengi, en ekki liggur fyrir hvert þeir fjármunir runnu. Morgunblaðið reyndi að ná tali af Pálma í gær, án árangurs.

Riftunarmál tekin fyrir

Fjölmörg riftunarmál á hendur fyrrum eigendum og stjórnendum Fons voru þingfest í Héraðsdómi Reykjavíkur í gær. Meðal stefndu í einu málanna er félag að nafni Waverton Group Limited. Fram kemur í skjölum frá fyrirtækjaskrá Lúxemborgar að Waverton sé skráður forsvarsmaður Talden Holding. Ásamt Waverton eru Birefeld Holdings og Starbrook International skráð sem forsvarsmenn félagsins. Öll félögin eru skráð á Bresku jómfrúaeyjunum, nánar tiltekið Tortóla. Að sama skapi eru þau öll skráð á sama pósthólfið þar í landi.Talden Holding
» Skilaði miklum hagnaði árið 2007 eftir að hafa selt eignir til móðurfélagsins Fons. Skilaði inn ársreikningi fyrir árið 2007 um miðjan nóvember 2008 og félaginu slitið skömmu síðar.
» Forsvarsmenn Talden Holding voru þrjú skúffufyrirtæki með heimilsfesti á Tortóla.