Segja sölu á FIH ekki frágengna
Höfuðstöðvar FIH við Löngulínu í Kaupmannahöfn.
Ekki liggur ljóst fyrir hver eignast danska bankann FIH þar sem Seðlabanki Íslands og skilanefnd Kaupþings eru ekki sammála um hvaða tilboði eigi að taka í bankann. Þetta kemur fram á Business.dk, viðskiptavef Berlingske Tidende.
Samkvæmt frétt dönsku sjónvarpsstöðvarinnar TV2 í gær keyptu tveir danskir lífeyrissjóðir, ATP og PFA, ásamt sænska tryggingafélaginu Folksam, FIH Erhvervsbank af skilanefnd Kaupþings.
PFA, ATP og Folksam stóðu saman að tilboði í FIH og öttu kappi við enska fjárfestingarsjóðinn Triton, sem áttti samvinnu við nokkra danska lífeyrissjóði um tilboð í bankann.
Samkvæmt heimildum Business.dk áttu Íslendingar fund með báðum hópunum sem gerðu tilboð í FIH á Hilton hótelinu á Kastrup flugvelli í morgun. Hafa fulltrúar fjárfestanna nú yfirgefið hótelið og sitja Íslendingarnir á rökstólum um hver fær að kaupa bankann.
Allt hlutafé í FIH er í eigu skilanefndar Kaupþings en skömmu fyrir fall Kaupþings í október 2008 voru öll hlutabréf FIH bankans sett að veði fyrir láni Seðlabankans til Kaupþings upp á 500 milljónir evra. Því veði hefur ekki verið aflétt, samkvæmt frétt Business.dk.
Samkvæmt fréttinni er talsverður munur á milli tilboða og ekki hægt að bera þau saman. ATP og PFA eru með hæsta tilboðið sem tryggir það að Seðlabanki Íslands fær að fullu endurgreitt lánið upp á 500 milljónir evra.
Hitt tilboðið er lægra en það þýðir að skilanefnd Kaupþings muni endurheimta hærri fjárhæð gangi rekstur FIH vel. Það veldur því að skilanefndin vill frekar taka því tilboði enda efast skilanefndin ekki um að rekstur bankans eigi eftir að ganga vel.
Þetta þýðir að illa gengur að komast að niðurstöðu í málinu en jafnvel er búist við að ákvörðunin liggi fyrir síðar í dag.
FIH bankinn hefur ekkert tjáð sig um söluferlið síðan 8. september en á vef bankans er að finna tilkynningu sem send var til kauphallararinnar þann dag um að söluferli sé í gangi og ekki sé hægt að tjá sig frekar um framvindu þess að svo stöddu.
SETT INN KL: 11:25
Mbl.is leitaði eftir svörum um hvort búið væri að selja FIH bankann hjá Seðlabanka Íslands og fékk þau svör að þegar hafi komið fram að FIH er í söluferli. Seðlabankinn getur ekki tjáð sig um málið fyrr en niðurstaða liggur fyrir.
