Seðlabanki Íslands mbl.is/Ómar

Greining Íslandsbanka reiknar með því að peningastefnunefnd Seðlabankans ákveði að lækka stýrivexti bankans um 1 prósentustig á næsta vaxtaákvörðunardegi, þann 22. september næstkomandi. Við þetta lækka vextir á viðskiptareikningum innlánsstofnana í 4,5% og vextir á lánum gegn veði til sjö daga í 6,0%.

Heldur Seðlabankinn þar með áfram vaxtalækkunarferli sínu en við síðustu vaxtaákvörðun peningastefnunefndarinnar 18. ágúst síðastliðinn ákvað nefndin að lækka vexti um 1,00 prósentur.

„Líkt og í mörgum fyrri yfirlýsingum lýsti peningastefnunefndin því yfir eftir ákvörðun sína síðast að héldist gengi krónunnar stöðugt eða styrktist, og verðbólga hjaðnaði eins og spáð er, ættu forsendur fyrir áframhaldandi slökun peningalegs aðhalds að vera til staðar. Viðskiptavegið meðalgengi krónunnar hefur hækkað um ríflega prósent frá vaxtaákvörðun nefndarinnar 18. ágúst síðastliðinn.

Hefur gengi krónunnar hækkað þrátt fyrir að Seðlabankinn hafi á tímabilinu hafið kaup á gjaldeyri til að efla þann hluta gjaldeyrisforðans sem ekki er fenginn að láni. Gjaldeyrishöftin, afgangur af vöru- og þjónustuviðskiptum við útlönd ásamt vaxtamun við helstu viðskiptalönd Íslands hefur haldið áfram að styrkja krónuna.

Verðbólgan hefur einnig haldið áfram að hjaðna og í takti við það sem reiknað var með. Við síðustu vaxtaákvörðun stóð verðbólgan í 4,8% en er nú 4,5%. Þegar ekki er tekið tillit til áhrifa óbeinna skatta minnkaði verðbólgan á þessu tímabili úr 4,0% niður í 3,8%. Líkur eru á því að verðbólgan hjaðni áfram á næstunni og má reikna með því að hún verði komin niður í  2,5% verðbólgumarkmið Seðlabankans fyrir mitt næsta ár og fyrr ef frá eru talin áhrif óbeinna skatta. Þá er verðbólguálag á skuldabréfamarkaði á bilinu 2,4% til 2,8% eftir tímalengdum og því nálægt verðbólgumarkmiði Seðlabankans," segir í Morgunkorni Íslandsbanka.