mbl.is

Greining Íslandsbanka fjallar í Morgunkorni dagsins um tilkynningu lánshæfismatsfyrirtækisins Moody's þar sem fram kemur að þrátt fyrir að nýlegur dómur Hæstaréttar um viðeigandi vexti gengisbundinna lána dragi úr óvissu þá séu enn of miklar blikur á lofti til þess að hægt sé að breyta neikvæðum horfum fyrir Baa3-einkunn ríkissjóðs Íslands í stöðugar. Veltir Greining fyrir sér hvað hin matsfyrirtækin, það er Fitch og S&P muni gera varðandi mat á Íslandi.

Ein megin ástæða þess að Moody's breytti horfum lánshæfiseinkunna ríkissjóðs úr stöðugum í neikvæðar þann 29. júlí síðastliðinn sú óvissa sem dómur Hæstaréttar um ólögmæti gengisbundinna lána skapaði fyrir bankakerfið. Óvissan gæti kallað á frekari fjármögnun frá ríkinu sem augljóslega hefði neikvæð áhrif á fjármál  hins opinbera sem og skuldastöðu.

Neikvætt að endurfjármögnun ÍLS ekki lokið

„Ljóst er að Moody´s telur þennan nýja dóm Hæstaréttar um gengisbundin lán jákvætt skref  við að draga úr óvissu en að það eitt og sér sé ekki nægjanlegt til þess að fyrirtækið ákveði að taka lánshæfiseinkunnir ríkissjóðs af neikvæðum horfum.

Annað sem Moody´s nefndi að sé jákvætt er að Alþjóðagjaldeyrissjóðurinn (AGS) stefnir að ljúka sinni þriðju endurskoðun fyrir septemberlok og í kjölfarið verður sá hluti láns AGS sem tengist þessum áfanga greiddur út, samtals 160 m. bandaríkjadala.

Á hinn bóginn er sú mikla óvissa sem umliggur íslenska efnahagslífið og framtíðarhorfur þess neikvæð. Þessi óvissa er margþætt og nefndi fyrirtækið hugsanlega yfirvofandi málsóknir vegna gengisbundinna lána sem tafið gætu enn fyrir því að endurskipulagning á skuldum einstaklinga og fyrirtækja náist að fullu, sem aftur hefur neikvæð áhrif á hagvöxt.

Einnig er Icesave deilan enn óleyst sem og endurfjármögnun Íbúðalánasjóðs, en henni þarf að vera lokið fyrir árslok. Til viðbótar telur Moody´s að enn sé gríðarleg óvissa uppi um efnahagslegar horfur fyrir Ísland þar sem landsframleiðslutölurnar fyrir síðasta ár voru endurskoðaðar og benda nú til þess að enn hafi töluverður samdráttur verið í hagkerfinu síðustu ársfjórðunga," segir í Morgunkorni.

Moody's nefnir þrennt sem gætti leitt lækkunar á lánshæfiseinkunnum ríkissjóðs. Í fyrsta lagi getur áframhaldandi óvissa haft neikvæð áhrif á raunhagkerfið. Í öðru lagi gætu frekari áföll í bankakerfinu leitt til þess að ríkið yrði að dæla enn frekara fjármagni til þess, sem eykur enn á þegar háa skuldastöðu ríkisins. Í þriðja lagi nefnir það þrýsting á lausafjárstöðu í erlendum gjaldeyri, sem gæti tengst því að Icesave deilan er óleyst. Það sem hefur jákvæð áhrif á lánshæfismat ríkissjóðs eru merki um viðvarandi bata hagkerfisins og árangursríkar lausnir á hinum ýmsu málum sem óvissa umliggur.

Afar neikvætt ef fleiri setja Ísland í spákaupmennskuflokk

„Forvitnilegt verður að sjá hvort hin stóru matsfyrirtækin, þ.e. Fitch Ratings og Standard & Poor´s (S&P), fari að láta á sér kveða. Lánshæfiseinkunn ríkissjóðs fyrir langtímaskuldbindingar í erlendri mynt er þegar í spákaupmennskuflokki hjá Fitch og hefur jafnframt verið á neikvæðum horfum frá því í janúar síðastliðinn. Hjá S&P er lánshæfiseinkunn ríkissjóðs fyrir sama flokk skuldbindinga BBB- og þar með þrepi frá því að detta niður í spákaupmennskuflokk, líkt og hjá Moody´s.

Horfur um einkunnir ríkissjóðs hjá S&P eru jafnframt einnig neikvæðar. Við teljum ekki líklegt að matsfyrirtækin lækki lánshæfiseinkunnir ríkissjóðs í bráð miðað við atburðarás síðasta mánuðinn, þ.e. gengisdóminn, Icesave á dagskrá og líkur á að þriðja endurskoðun sé í höfn.

Það gefur auga leið að það væri afar neikvætt ef ríkissjóður myndi falla niður í spákaupmennskuflokk hjá öðru lánshæfismatsfyrirtæki en Fitch, enda myndi slíkt tefja fyrir því að ríkissjóður gæti sótt sér fé á erlenda markaði og grafa undan tiltrú fjárfesta á Íslandi," segir í Morgunkorni Greiningar Íslandsbanka.