Talsmaður Björgólfs Thors Björgólfssonar segir, að ekki sé gefið upp hvaða breytingar hefðu verið gerðar á eignarhaldi Actavis við yfirtöku þýska bankans Deutsche Bank á félaginu og hversu stóran hlut bankinn kynni að eiga í því.

Þá hafa heldur ekki fengist upplýsingar um það hvaða áhrif þessar breytingar kunna að hafa haft á hlut Björgólfs Thors í Actavis. Ekki náðist í talsmann Actavis. 

Ekki yfirtaka á Actavis

Reutersfréttastofan sagði í gærkvöldi að Deutsche Bank hefði fengi samþykki frá samkeppnisyfirvöldum Evrópusambandsins fyrir yfirtöku bankans á íslenska samheitalyfjafyrirtækinu Actavis og vitnaði í tilkynningu frá framkvæmdastjórn ESB. 

Ekki er rétt að tala um að Deutsche Bank hafi tekið yfir Actavis, að mati Ragnhildar Sverrisdóttur, talsmanns Björgólfs Thors Björgólfssonar. Hún segir að í raun hafi engar breytingar átt sér stað, um fjárhagslega endurskipulagningu hafi verið að ræða og Björgólfur Thor verði áfram stjórnarformaður félagsins eins og áður.