Sviptingar á fasteignamarkaði
Fasteignasala hefur aukist mikið milli ára á höfuðborgarsvæðinu mbl.is/Valdís Þórðardóttir
Alls voru seldar 347 fasteignir á höfuðborgarsvæðinu í september. Heildarvelta nam 9,8 milljörðum króna . Í ágúst voru seldar 211 fasteignar þannig að aukningin er 64,5% á milli mánaða. Í september 2007 voru hins vegar seldar 924 fasteignir og nam veltan 31 milljarði króna.
Fjöldi þinglýstra kaupsamninga um fasteignir við sýslumannsembættin á höfuðborgarsvæðinu í september 2010 var 347. Heildarvelta nam 9,8 milljörðum króna og meðalupphæð á hvern kaupsamning var 28,3 milljónir króna. Viðskipti með eignir í fjölbýli námu 6,5 milljörðum, viðskipti með eignir í sérbýli 2,9 milljörðum og viðskipti með aðrar eignir 500 milljónum króna.
Milli mánaða er aukningin 64,5%
Þegar september 2010 er borinn saman við ágúst 2010 fjölgar kaupsamningum um 64,5% og velta eykst um 51,8%. Í ágúst 2010 var þinglýst 211 kaupsamningum, velta nam 6,5 milljörðum króna og meðalupphæð á hvern kaupsamning 30,6 milljónir króna.
Á milli ára eykst veltan um 58,6%
Þegar september 2010 er borinn saman við september 2009 fjölgar kaupsamningum um 52,2% og velta eykst um 58,6%. Í september 2009 var þinglýst 228 kaupsamningum, velta nam 6,2 milljörðum króna og meðalupphæð á hvern kaupsamning 27,1 milljón króna, að því er fram kemur á vef Þjóðskrár Íslands.
Rúm 20% eru makaskiptasamningar
Makaskiptasamningar voru 69 í september 2010 eða 20,8% af öllum samningum. Í ágúst 2010 voru makaskiptasamningar 38 eða 18,9% af öllum samningum. Í september 2009 voru makaskiptasamningar 75 eða 35,2% af öllum samningum. Makaskiptasamningur er þegar hluti kaupverðs er greitt með annarri fasteign. Upplýsingar um makaskiptasamninga eiga eingöngu við um íbúðarhúsnæði.
Veltan rúmlega 21 milljarði minni og 577 færri fasteignir
Ef hins vegar er horft lengra aftur, það er fyrir hrunið fyrir tveimur árum sést að alls seldust 362 fasteignir í september 2008 og var heildarveltan 11.282 milljónir króna.
Í september 2007 seldust 924 fasteignir og nam heildarveltan á fasteignamarkaði á höfuðborgarsvæðinu 30.952 milljónum króna. Það þýðir að á einungis þremur árum hefur kaupsamningum fækkað um 577 í septembermánuði og veltan minnkað um rúman 21 milljarð króna.
Veltumesti mánuður í fasteignasölu á höfuðborgarsvæðinu virðist hafa verið júlímánuður 2007 er veltan nam 31.816 milljónum króna en alls var 999 fasteignum þinglýst þann mánuðinn.
