Hægt að ganga frá beiðni um endurútreikning
Íslandsbanki. mbl.is/Golli
Íslandsbanki Fjármögnun opnaði fyrir endurútreikning á hluta af bílalánum, bílasamningum og kaupleigusamningum í erlendri mynt sl. föstudag. Viðskiptavinir sem hafa verið greiðendur á láni frá útgáfudegi geta nú skoðað stöðu lánsins á vefsvæði Íslandsbanka og gengið frá beiðni um endurútreikning. Þetta kemur fram á vef bankans.
Þá segir að rúmlega 1.400 viðskiptavinir séu búnir að senda inn beiðni um að ganga frá endurútreikningi í gegnum netið eða með því að hafa beint samband við starfsmenn en rúmlega 5.000 lán séu endurútreiknuð þessum fyrsta áfanga.
„Eftirstöðvar stórs hluta lána viðskiptavina lækka verulega frá því sem þær stóðu í áður en dómur Hæstaréttar féll í júní síðastliðnum. Þeir viðskiptavinir sem hafa ofgreitt til Íslandsbanka Fjármögnunar geta valið um að láta upphæðina ganga inná eftirstöðvar lánsins eða fá hana greidda inn á reikning.
Í næsta áfanga verða endurreiknuð þau lán sem hafa verið uppgreidd hjá Íslandsbanka Fjármögnun og er reiknað með að þeir útreikningar liggi fyrir í nóvember. Enn ríkir óvissa um það hvernig haga skuli uppgjöri lána sem hafa verið yfirtekin á lánstíma og því er ekki ljóst hvenær niðurstaða fæst í þeim tilvikum,“ segir á vef bankans.
