mbl.is/Árni Sæberg

Gríðarleg óvissa ríkir um hvort og hvernig og hvenær og í hvaða röð næstu skref í afnámi gjaldeyrishaftanna verða framkvæmd.  Segir Greining Íslandsbanka að þessi óvissa sé gríðarlega slæm fyrir markaðsaðila, stjórnvöld og erlenda fjárfesta.

„Erfitt er að sjá að hægt sé að byggja upp traust á íslensku efnahags- og fjármálalífi meðan höftin eru eins rækilega í sessi og nú er og óvissan um framhald þeirra svona mikil.

Athyglisvert er að forsvarsmenn Seðlabankans kjósi að gefa út nýjar upplýsingar um fyrirætlanir sínar í jafn mikilvægu máli í ræðum og erindum á lokuðum fundum hér og þar um landið í stað þess að nýta t.d. vaxtaákvörðunardagana sem er hin formlega upplýsingaleið bankans til markaðsaðila og annarra til að gefa út þessar upplýsingar með skilvirkum og gagnsæjum hætti.

Að okkar mati ríður nú á að Seðlabankinn gefi skýr skilaboð um hvað í vændum er og komi endurskoðaðri áætlun um afnám haftanna út sem allra fyrst," segir í Morgunkorni Íslandsbanka. 

Arnór Sighvatsson aðstoðarseðlabankastjóri flutti í gær erindi um gjaldeyrishöftin fyrir fagfjárfesta á morgunfundi Íslenskra verðbréfa. 

Á síðasta vaxtaákvörðunarfundi Seðlabankans í september var svo að skilja á rökstuðningi peningastefnunefndarinnar að afnám haftanna væri nú að færast nær þó ekkert hafi verið gefið uppi varðandi tímasetningar eða útfærslu við það tilefni.

Í kjölfarið fóru af stað miklar vangaveltur um yfirvofandi afnám hafta sem m.a. höfðu mikil áhrif á skuldabréfamarkaði enda hafði verið kynnt undir væntingum þess efnis að næsta skref í afnámi haftanna væri á næsta leyti.

Már Guðmundsson, seðlabankastjóri, sló svo aftur á þær væntingar í ræðu sem hann flutti á aðalfundi Samtaka fiskvinnslustöðva í lok september en þar sagði hann að það væri misskilningur ef einhver héldi að tíminn í þessu sambandi væri talinn í vikum fremur en mánuðum. Nefndi hann að áður en næsta skref yrði tekið þyrfti að fá gjaldeyrinn í hús eftir þriðju endurskoðun áætlunar AGS og stjórnvalda.