6,4% atvinnuleysi í haust

Á þriðja ársfjórðungi 2010 voru að meðaltali 11.700 manns án vinnu og í atvinnuleit eða 6,4% vinnuaflsins. Atvinnuleysi mældist 6,1% hjá körlum og 6,8% hjá konum.

Atvinnuleysi mældist 6% á þriðja ársfjórðungi í fyrra og 8,7% á öðrum ársfjórðungi á þessu ári. Frá þriðja ársfjórðungi 2009 til þriðja ársfjórðungs 2010 fjölgaði atvinnulausum um 800 manns, að sögn Hagstofunnar.

Atvinnuleysið var mest meðal fólks á aldrinum 16-24 ára, eða 11,1%. Hjá hópnum 24-54 ára var atvinnuleysi 6% og 3,8% hjá 55-74 ára. Á þriðja ársfjórðungi var atvinnuleysi 8% á höfuðborgarsvæðinu en 3,6% utan þess.

Af þeim sem voru atvinnulausir á þriðja ársfjórðungi 2010 höfðu 600 fengið vinnu sem átti að hefjast síðar, eða 4,7%. Til samanburðar höfðu 800 manns fengið vinnu, eða 7,4%, á þriðja ársfjórðungi 2009. Á þriðja ársfjórðungi 2010 höfðu um 2700 manns verið atvinnulausir í 12 mánuði eða lengur, eða 23,1% atvinnulausra, en voru á sama tímabili 2009 um 800 manns, eða 7,1%.

Starfandi fólki fækkar

Fjöldi starfandi á þriðja ársfjórðungi 2010 var 170.200 manns, að sögn Hagstofunnar, og fækkaði um 1.300 frá sama tíma ári áður. Á vinnumarkaði voru alls 181.900 manns sem jafngildir 81,4% atvinnuþátttöku. Atvinnuþátttaka karla var 84,1% og kvenna 78,6%. 

Á þriðja ársfjórðungi 2009 voru alls 182.500 á vinnumarkaði og atvinnuþátttaka mældist þá 82,1%. Atvinnuþátttaka karla var 85,8% og kvenna 78,2%.

Vinnutími 40,4 stundir á viku

Á þriðja ársfjórðungi 2010 var meðalfjöldi vinnustunda 40,4 klst. hjá þeim sem voru við vinnu í viðmiðunarvikunni, 44,2 klst. hjá körlum en 36 klst. hjá konum. Meðalfjöldi vinnustunda hjá þeim sem voru í fullu starfi var 45,5 klst. en 23,8 klst. hjá þeim sem voru í hlutastarfi.

Á þriðja ársfjórðungi 2009 var meðalfjöldi vinnustunda 40,9 klst., 45 klst. hjá körlum en 35,9 klst. hjá konum. Þeir sem voru í fullu starfi unnu 45,3 klst. að jafnaði en þeir sem voru í hlutastarfi unnu að jafnaði 23,9 klst.

Vefur Hagstofunnar

mbl.is
Svæði

Gagnaveitur

Erlendar viðskiptafréttir