mbl.is/Rax

Spáð er í nýrri spá frá Seðlabanka Íslands að hagvöxtur verði hátt í 3% á árunum 2012-2013. Þá er því spáð að atvinna taki að vaxa frá miðju næsta ári og atvinnuleysi minnki smám saman eftir því sem líður á spátímann. Þetta kemur í nýrri útgáfu Peningamála.

Gengi krónunnar hefur haldist tiltölulega stöðugt frá útgáfu síðustu Peningamála, þrátt fyrir að Seðlabankinn hafi lækkað vexti í tvígang, um samtals 1,75 prósentur.

Samkvæmt grunnspá Seðlabanka Íslands mun gengi krónunnar styrkjast lítillega þegar líða tekur á spátímann, sem er til næstu þriggja ára. Þróun alþjóðlegra efnahagsmála hefur verið með svipuðum hætti og gert var ráð fyrir í fyrri spám bankans en þróttur innlends efnahagslífs á fyrri hluta ársins virðist hafa verið heldur minni en spáð var.

Spá 3% atvinnuleysi í lok árs 2013

Samkvæmt spá bankans verður atvinnuleysi komið niður í rúm 3% á síðasta ársfjórðungi 2013 og verður svipað og það atvinnuleysi sem talið er samrýmast jafnvægi í þjóðarbúskapnum og eðlilegum tilflutningi fólks á milli starfa vegna breytinga í atvinnulífinu og aðstæðum fólks. Seðlabankinn segir líklegt, að samdráttur landsframleiðslu hafi verið 6,9% á öðrum fjórðungi. Jafnframt sé útlit fyrir að landsframleiðslan dragist saman um 2,6% á þessu ári, í stað 1,9% í ágústspánni, og komi sá samdráttur í kjölfarið á 6,8% samdrætti á síðasta ári. Efnahagssamdrátturinn hér á landi í kjölfar fjármálakreppunnar sé því meiri en í flestum öðrum löndum.

Bankinn telur, að efnahagsbatinn hafi hafist á þriðja fjórðungi ársins og að hann haldi áfram á þeim fjórða. Vöxturinn sé heldur meiri en spáð var í ágúst, en á móti komi, að horfur fyrir fyrri hluta næsta árs eru lakari. Útlit sé því fyrir að hagvöxtur á næsta ári verði heldur minni en spáð var í ágúst eða 2,1%, en 2,7% árið 2012 og 3% árið 2013.

Verðbólga hefur hjaðnað hraðar en spáð var í ágúst og nú eru horfur á að hún verði við verðbólgumarkmið bankans í árslok, sem er nokkru fyrr en áður hafði verið spáð. Verðbólga eykst jafnframt minna í byrjun næsta árs en áður var talið vegna breyttra forsendna um hækkun neysluskatta en samkvæmt frumvarpi til fjárlaga hækka þessir skattar minna en áður var gert ráð fyrir.

Stöðugt gengi krónunnar, hóflegar launahækkanir á spátímanum, hjöðnun verðbólguvæntinga og slaki í efnahagslífinu munu leiða til þess að verðbólga hjaðnar fram á mitt næsta ár, en þá tekur hún að aukast á ný í átt að verðbólgumarkmiðinu.

Töluverð óvissa er um efnahagshorfur næstu missera. Efnahagsbatinn gæti orðið veikari ef bakslag kemur í hinn alþjóðlega efnahagsbata, ef mikil skuldsetning heimila heldur meira aftur af vexti einkaneyslu en gert er ráð fyrir í spánni og ef fjárfesting í orkufrekum iðnaði tefst enn frekar.

Sama er uppi á teningnum ef launahækkanir verða meiri en samræmist verðstöðugleika og ef aðhaldsaðgerðir fjárlagafrumvarpsins ganga ekki eftir þótt einnig gætu fylgt skammvin örvunaráhrif.

Efnahagsbatinn gæti aftur á móti orðið kröftugri ef raungengið hækkar hraðar í átt að langtímajafnvægi og ef batinn í atvinnuvegafjárfestingu reynist meiri en í grunnspánni.